Tasmiṃ khaṇe sārīputtatthero samāpattito vuṭṭhāya "kattha nu kho ajja mayā gantabbanti attano bhikkhācāraṃ olokento tassa gehe khīrayāguṃ disvā "karissati nu kho me so puriso saṅgahanti upadhārento "maṃ disvā mama saṅgahaṃ karissati, karitvā ca pana mahāsampattiṃ labhissati ayaṃ kulaputtoti ñatvā cīvaraṃ pārupitvā pattamādāya tassa gehadvāre ṭhitameva attānaṃ dassesi. So theraṃ disvāva pasannacitto cintesi "mayā ciraṃ coraghātakakammaṃ kataṃ, bahū manussā māritā; idāni me gehe khīrayāgu paṭiyattā, thero ca āgantvā mama gehadvāre ṭhito; idāni mayā ayyassa deyyadhammaṃ dātuṃ vaṭṭatīti; purato ṭhapitaṃ yāguṃ apanetvā theraṃ upasaṅkamitvā vanditvā antogehe nisīdāpetvā patte khīrayāguṃ ākiritvā navasappī āsiñcitvā theraṃ vījamāno aṭṭhāsi. Athassa dīgharattaṃ aladdhapubbatāya khīrayāguṃ pātuṃ balavā ajjhāsayo ahosi. Thero tassajjhāsayaṃ ñatvā taṃ "upāsaka attano yāguṃ pivāti āha.

So aññassa hatthe vījaniṃ datvā sayaṃ yāguṃ pivi. Thero vījamānaṃ purisaṃ "gaccha, upāsakameva vījāhīti āha. So vījiyamāno kucchipūraṃ yāguṃ pivitvā āgantvā theraṃ vījamāno ṭhatvā katabhattakiccassa therassa pattaṃ aggahesi. Thero tassa anumodanaṃ ārabhi. So attano cittaṃ therassa dhammadesanānugataṃ kātuṃ nāsakkhi. Thero sallakkhetvā "upāsaka kasmā cittaṃ desanānugataṃ kātuṃ na sakkosīti pucchi. "bhante mayā dīgharattaṃ kakkhaḷakammaṃ kataṃ, bahū manussā māritā, tamahaṃ attano kammaṃ saranto cittaṃ ayyassa desanānugataṃ kātuṃ nāsakkhinti. Thero "vañcessāmi nanti cintetvā "kiṃ pana tvaṃ attano ruciyā akāsi, aññehi kāritosīti. "rājā maṃ kārāpesi bhanteti. "kiṃ nu kho te upāsaka evaṃ sante akusalaṃ hotīti. Mandadhātuko upāsako therenevaṃ vutto "natthi mayhaṃ akusalanti saññī hutvā "tenahi bhante dhammaṃ kathethāti. So there anumodanaṃ karonte, ekaggacitto hutvā dhammaṃ suṇanto sotāpattimaggassa orato anulomikaṃ khantiṃ nibbattesi. Theropi anumodanaṃ katvā pakkāmi. Upāsakaṃ thokaṃ theraṃ anugantvā nivattamānaṃ ekā yakkhinī dhenuvesena āgantvā ure paharitvā māresi. So kālaṃ katvā tusitapure nibbatti.