Pattacīvaranti puṭṭho "na paripuṇṇanti āha. Atha naṃ satthā "tenahi pattacīvaraṃ pariyesāhīti vatvā pakkāmi. So kira vīsativassasahassāni samaṇadhammaṃ karonto "bhikkhunā nāma attanā paccaye labhitvā aññaṃ anoloketvā sayameva paribhuñjituṃ vaṭṭatīti ekabhikkhussapi pattena vā cīvarena vā saṅgahaṃ nākāsi. Tenassa "iddhimayapattacīvaraṃ na uppajjissatīti ñatvā ehibhikkhubhāvena pabbajjaṃ nādāsi. Tampi pattacīvaraṃ pariyesamānameva ekā yakkhinī dhenurūpena āgantvā vāmaūrumhi paharitvā jīvitakkhayaṃ pāpesi. Satthā piṇḍāya caritvā katabhattakicco sambahulehi bhikkhūhi saddhiṃ nikkhamanto bāhiyassa sarīraṃ saṅkāraṭṭhāne patitaṃ disvā bhikkhū āṇāpesi "bhikkhave ekasmiṃ gehadvāre ṭhatvā mañcakaṃ āharāpetvā imaṃ sarīraṃ nagarato nīharitvā jhāpetvā thūpaṃ karothāti. Bhikkhū tathā kariṃsu; katvā ca pana vihāraṃ gantvā satthāraṃ upasaṅkamitvā attanā katakiccaṃ ārocetvā tassa abhisamparāyaṃ pucchiṃsu. atha nesaṃ bhagavā tassa parinibbutabhāvaṃ ācikkhitvā "etadaggaṃ bhikkhave mama sāvakānaṃ bhikkhūnaṃ khippābhiññānaṃ, yadidaṃ bāhiyo dārucīriyoti etadagge ṭhapesi. Atha naṃ bhikkhū pucchiṃsu "bhante tumhe `bāhiyo dārucīriyo arahattaṃ pattoti vadetha, kadā so arahattaṃ pattoti. "mama dhammaṃ sutakāle bhikkhaveti. "kadā panassa tumhehi dhammo kathitoti. "piṇḍāya carantena antaravīthiyaṃ ṭhatvāti. "appamattako hi bhante

Tumhehi antaravīthiyaṃ ṭhatvā kathitadhammo, kathaṃ so tāvatakena visesaṃ nibbattesīti. Atha ne satthā "bhikkhave mama dhammaṃ `appaṃ vā bahuṃ vāti mā minātha; anekānipi hi gāthāsahassāni anatthanissitāni na seyyo, atthanissitaṃ pana ekampi gāthāpadaṃ seyyoti vatvā anusandhiṃ ghaṭetvā dhammaṃ desento imaṃ gāthamāha

"sahassamapi ce gāthā anatthapadasañhitā;

ekaṃ gāthāpadaṃ seyyo, yaṃ sutvā upasammatīti.