Āyuvaḍḍhanakumāravatthu.

9. Saṅkiccasāmaṇeravatthu. (89)

"yo ca vassasataṃ jīveti imaṃ dhammadesanaṃ satthā jetavane viharanto saṅkiccasāmaṇeraṃ ārabbha kathesi.

Sāvatthiyaṃ kira tiṃsamattā kulaputtā dhammakathaṃ sutvā satthu sāsane uraṃ datvā pabbajiṃsu. Te upasampadāya pañcavassā hutvā satthāraṃ upasaṅkamitvā "ganthadhuraṃ vipassanādhuranti dve dhurāni sutvā mahallakakāle pabbajitattā ganthadhure ussāhaṃ akatvā vipassanādhuraṃ pūretukāmā yāva arahattā kammaṭṭhānaṃ kathāpetvā "bhante ekaṃ araññāyatanaṃ gamissāmāti satthāraṃ āpucchiṃsu. Satthā "kataraṇṭhānaṃ gamissathāti pucchitvā, "asukaṃ nāmāti vutte, "tattha tesaṃ ekaṃ vighāsādaṃ nissāya bhayaṃ uppajjissati, tañca pana saṅkiccasāmaṇere gate vūpasamissati, atha nesaṃ pabbajitakiccaṃ pāripūriṃ gamissatīti aññāsi.