Tattha yathā bhisamulāḷakumudanāḷakalāpavivarehi paggharantaṃ udakaṃ na jānāti "ahaṃ bhisamulāḷakumudanāḷakalāpavivarehi paggharāmī"ti, napi "bhisamulāḷakumudanāḷakalāpavivarāni jānanti "amhehi udakaṃ paggharatī"ti, evameva na sedo jānāti "ahaṃ kesalomakūpavivarehi paggharāmī"ti, napi kesalomakūpavivarāni jānanti "amhehi sedo paggharatī"ti, ābhogapaccavekkhaṇavirahitā hi ete dhammā .pe. Na puggaloti. Paricchedato sedo sedabhāgena paricchinnoti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ sedaṃ vaṇṇādito vavatthapeti.

Tato paraṃ sarīre cammamaṃsantare medo vaṇṇato phālitahaliddivaṇṇoti vavatthapeti. Saṇṭhānato anekasaṇṭhānoti. Tathāhi sukhino thūlasarīrassa cammamaṃsantare pharitvā ṭhito haliddirattadukūlapilotikasaṇṭhāno, kīsasarīrassa jaṅghamaṃsaurumaṃsa- piṭṭhikaṇṭakanissitapiṭṭhimaṃsaudarapaṭalamaṃsāni ninsāya saṃvelletvā ṭhapitahaliddirattadukūlapilotikakhaṇḍasaṇṭhāno, disato dvīsu disāsu jāto. Okāsato thūlasarīrassa sakalasarīraṃ pharitvā kīsassa jaṅghamaṃsādīni nissāya ṭhito, yo sinehasaṅkhātopi hutvā paramajegucchattā na matthakatelatthaṃ na natthutelatthaṃ na gaṇḍūsatelatthaṃ na dīpajalanatthaṃ saṅgayhati.

Tattha yathā maṃsapuñjaṃ nissāya ṭhitā haliddirattadukūlapilotikā na jānāti "ahaṃ maṃsapuñjaṃ nissāya ṭhitā"ti, napi maṃsapuñjo jānāti "haliddirattadukūlapilotikā maṃ nissāya ṭhitā"ti, evameva na medo jānāti "ahaṃ sakalasarīraṃ jaṅghādīsu vā maṃsaṃ nissāya ṭhito"ti, napi sakalasarīraṃ jaṅghādīsu vā maṃsaṃ jānāti "medo maṃ nissāya ṭhito"ti. Ābhogapaccavekkhaṇavirahitā hi ete dhammā .pe.