@2. Ma. Yu. khīṇāya bhavanettiyā diṭṭhadhamme yathātathaṃ. Evarūpaṃ pāṭihāriyaṃ disvā agāramajjhe kiccaṃ natthi, ayyassa santike pabbajissāmīti. "mayaṃpi tatheva karissāmāti. "sādhu tātāti. Tato pañcasatāpi corā sāmaṇeraṃ vanditvā pabbajjaṃ yāciṃsu. So tesaṃ asidhārāhi eva kese ca vatthadasā ca chinditvā tambamattikāya rajitvā tāni kāsāyāni acchādetvā dasasu sīlesu patiṭṭhāpetvā te ādāya gacchanto cintesi "sacāhaṃ there adisvāva gamissāmi, te samaṇadhammaṃ kātuṃ na sakkhissanti, corānaṃ maṃ gahetvā nikkhantakālato pabhūti tesaṃ ekopi assūni sandhāretuṃ nāsakkhi, `mārito nu kho sāmaṇero noti cintentānaṃ kammaṭṭhānaṃ abhimukhaṃ na bhavissati; tasmā disvāva te gamissāmīti. So pañcasatabhikkhuparivāro tattha gantvā, attano dassanena paṭiladdhassāsehi tehi "kiṃ sappurisa saṅkicca laddhante jīvitanti vutte, "āma bhante, ime maṃ māretukāmā hutvā māretuṃ asakkontā mama guṇe pasīditvā dhammaṃ sutvā pabbajitā; ahaṃ `tumhe disvā gamissāmīti āgato, appamattā samaṇadhammaṃ karotha, ahaṃ satthu santikaṃ gamissāmīti te bhikkhū vanditvā itare ādāya upajjhāyassa santikaṃ gantvā, "kiṃ saṅkicca antevāsikā te laddhāti vutte, "āma bhanteti taṃ pavattiṃ ārocesi, therena ca "gaccha saṅkicca, satthāraṃ passāhīti vutte, "sādhūti theraṃ vanditvā te ādāya satthu santikaṃ gantvā, satthārāpi "saṅkicca antevāsikā te laddhāti Vutte, taṃ pavattiṃ ārocesi. Satthā "evaṃ kira bhikkhaveti pucchitvā, "āma bhanteti vutte, "tumhākaṃ corakammaṃ katvā dussīle patiṭṭhāya vassasataṃ jīvitato idāni sīle patiṭṭhāya ekadivasampi jīvitaṃ seyyoti vatvā anusandhiṃ ghaṭetvā dhammaṃ desento imaṃ gāthamāha

"yo ca vassasataṃ jīve dussīlo asamāhito,

ekāhaṃ jīvitaṃ seyyo sīlavantassa jhāyinoti.

Tattha "dussīloti: nissīlo. Sīlavantassāti: dussīlassa vassasataṃ jīvitato sīlavantassa dvīhi jhānehi jhāyino ekadivasaṃpi ekamuhuttampi jīvitaṃ seyyo uttamanti attho.