mātā pitā ca bhātā ca ekacitakamhi ḍayhareti vilapantī paribbhami. Manussā taṃ disvā "ummattikā ummattikāti kacavaraṃ gahetvā paṃsuṃ gahetvā matthake okirantā leḍḍūhi paharanti. Satthā jetavanamahāvihāre catuparisamajjhe nisīditvā dhammaṃ desento taṃ āgacchamānaṃ addasa kappasatasahassaṃ pūritapāramiṃ abhinīhārasampannaṃ.
Sā kira padumuttarabuddhakāle padumuttarasatthārā ekaṃ vinayadharattheriṃ bāhāya gahetvā nandanavane viya etadagge ṭhapiyamānaṃ disvā "ahaṃpi tumhādisassa buddhassa santike vinayadharattherīnaṃ aggaṭṭhānaṃ labheyyanti adhikāraṃ katvā patthanaṃ ṭhapesi. Padumuttarabuddho anāgataṃsañāṇaṃ pattharitvā patthanāya samijjhanabhāvaṃ ñatvā "anāgate gotamabuddhassa nāma sāsane ayaṃ paṭācārānāmena vinayadharattherīnaṃ aggā bhavissatīti byākāsi.
Taṃ evaṃ patthitappatthanaṃ abhinīhārasampannaṃ satthā dūratova āgacchantiṃ disvā "imissā maṃ ṭhapetvā añño avassayo bhavituṃ samattho nāma natthīti cintetvā taṃ, yathā vihārābhimukhī āgacchati, evamakāsi. Parisā taṃ disvā "imissāva ummattikāya ito āgantuṃ mā daditthāti āha. Satthā "apetha, mā naṃ nivārayitthāti vatvā avidūraṭṭhānaṃ āgatakāle "satiṃ paṭilabha bhaginīti āha. Sā taṃkhaṇaññeva buddhānubhāvena satiṃ paṭilabhi. Tasmiṃ kāle nivatthavatthassa patitabhāvaṃ sallakkhetvā hirottappaṃ paccupaṭṭhāpetvā ukkuṭikaṃ nisīdi. Athassā eko puriso uttarasāṭakaṃ khipi. Sā taṃ nivāsetvā satthāraṃ upasaṅkamitvā suvaṇṇavaṇṇesu pādesu pañcappatiṭṭhitena vanditvā "bhante avassayo me hotha; ekaṃ hi me puttaṃ seno gaṇhi, eko udakena vuḷho, panthe pati mato, mātāpitaro ceva bhātā ca gehena avatthaṭā ekacitakāya jhāyantīti. Satthā tassā vacanaṃ sutvā "paṭācāre mā cintayi, tava tāṇaṃ saraṇaṃ avassayo bhavituṃ samatthasseva santikaṃ āgatāsi; yathā hi tava idāni eko putto senena gahito, eko udakena vuḷho, panthe pati mato, mātāpitaro ceva bhātā ca gehena avatthaṭā, evameva imasmiṃ saṃsāre puttādīnaṃ matakāleyeva tava rodantiyā paggharitaassu catunnaṃ mahāsamuddānaṃ udakato bahutaranti vatvā imaṃ gāthamāha