Paṭācārāvatthu.

13. Kisāgotamīvatthu. (93)

"yo ca vassasataṃ jīveti imaṃ dhammadesanaṃ satthā jetavane viharanto kisāgotamiṃ ārabbha kathesi.

Sāvatthiyaṃ kirekassa seṭṭhissa gehe cattāḷīsakoṭidhanaṃ aṅgārā eva hutvā aṭṭhāsi. Seṭṭhī taṃ disvā uppannasoko āhāraṃ paṭikkhipitvā mañcake nipajji. Tasseko sahāyako gehaṃ gantvā "samma kasmā socasīti pucchitvā taṃ pavattiṃ sutvā "samma mā soci, ahaṃ ekaṃ upāyaṃ jānāmi, taṃ karohīti. "kiṃ karomi sammāti. "samma attano āpaṇe kilañjaṃ pattharitvā aṅgāre rāsiṃ katvā vikkīṇanto viya nisīda, āgatāgatesu manussesu ye evaṃ vadanti `sesajanā vatthatelamadhuphāṇitādīni vikkīṇanti, tvaṃ pana aṅgāre vikkīṇanto nisinnosīti, te vadeyyāsi `attano santakaṃ avikkīṇanto kiṃ karissāmīti; yo pana taṃ evaṃ vadeti `sesajanā vatthatelamadhuphāṇitādīni vikkīṇanti, tvaṃ pana hiraññasuvaṇṇaṃ vikkīṇanto nisinnosīti, taṃ vadeyyāsi `kahaṃ hiraññasuvaṇṇanti, `idanti ca vutte, `āhara tāva nanti hatthehi paṭiccheyyāsi, evaṃ dinnaṃ tava hatthe hiraññasuvaṇṇaṃ bhavissati; sā pana sace kumārikā hoti, tava gehe puttassa naṃ āharitvā cattāḷīsakoṭidhanaṃ tassā niyyādetvā tāya dinnakaṃ valañjeyyāsi; sace kumāro hoti, tava gehe vayappattaṃ dhītaraṃ tassa datvā cattāḷīsakoṭidhanaṃ tassa niyyādetvā tena dinnakaṃ valañjeyyāsīti.