Balavamaccheraṃ bandhitvā gaṇhantaṃ viya saddhācittaṃ paṭibāhatiyeva. Tassa "dassāmi na dassāmīti cintentasseva paṭhamayāmo vītivatto. Tato majjhimayāme sampatte tasmiṃpi dātuṃ nāsakkhi. Pacchimayāme sampatte so cintesi "mama saddhācittena maccheracittena ca saddhiṃ yujjhantasseva dve yāmā vītivattā, idaṃ mama ettakaṃ maccheracittaṃ vaḍḍhamānaṃ catūhi apāyehi sīsaṃ ukkhipituṃ na dassati, dassāmi sāṭakanti. So maccherasahassaṃ abhibhavitvā saddhācittaṃ purecārikaṃ katvā sāṭakaṃ ādāya satthu pādamūle ṭhapetvā "jitaṃ me, jitaṃ meti tikkhattuṃ mahāsaddamakāsi.

Rājā pasenadikosalo dhammaṃ suṇanto taṃ saddaṃ sutvā "pucchatha naṃ, kiṃ kira tena jitanti āha. So rājapurisehi pucchito tamatthaṃ ārocesi. Taṃ sutvā rājā "dukkaraṃ kataṃ brāhmaṇena, saṅgahamassa karissāmīti ekaṃ sāṭakayugaṃ dāpesi. So tampi tathāgatasseva adāsi. Puna rājā "dve cattāri aṭṭha soḷasāti dviguṇaṃ katvā dāpesi. So tānipi tathāgatasseva adāsi. Athassa rājā dvattiṃsayugāni dāpesi. Brāhmaṇo "attano aggahetvā laddhaṃ laddhaṃ vissajjesiyevāti vādavimocanatthaṃ tato "ekaṃ yugaṃ attano ekaṃ brāhmaṇiyāti dve yugāni gahetvā tiṃsa yugāni tathāgatasseva adāsi. Rājā pana, tasmiṃ sattakkhattumpi dadante, puna dātukāmova ahosi. Pubbe mahāekasāṭako catusaṭṭhiyā sāṭakayugesu dve aggahesi. Ayampana dvattiṃsayugaladdhakāle dve aggahesi. Rājā Rājapurise āṇāpesi "dukkaraṃ bhaṇe brāhmaṇena kataṃ, antepure mama dve kambale āharāpeyyāthāti. Te tathā kariṃsu. Rājā satasahassagghanake dve kambale tassa dāpesi. Brāhmaṇo "na ime mama sarīre upayogaṃ arahanti, buddhasāsanasseva te anucchavikāti ekaṃ kambalaṃ antogandhakuṭiyaṃ satthu sayanassa upari vitānaṃ katvā bandhi, ekaṃ attano ghare nibaddhaṃ bhuñjantassa bhikkhuno bhattakiccaṭaṭhāne vitānaṃ katvā bandhi. Rājā sāyaṇhasamaye satthu santikaṃ gantvā kambalaṃ sañjānitvā "bhante kena pūjā katāti pucchitvā, "ekasāṭakenāti vutte, "brāhmaṇo mama pasādaṭṭhāneyeva pasīdatīti "cattāro hatthī cattāro asse cattāri kahāpaṇasahassāni catasso itthiyo catasso dāsiyo cattāro purise cattāro gāmavareti evaṃ yāva sabbasatā cattāri cattāri katvā sabbacatukkaṃ nāmassa dāpesi.