Tato paraṃ sarīre siṅghānikā vaṇṇato setataruṇatālamiñjavaṇṇāti vavatthapeti. Saṇṭhānato okāsasaṇṭhānā, sedetvā sedetvā nāsāpuṭe nirantaraṃ pakkhittavettaṅkurasaṇṭhānātipi eke. Disato uparimāya disāya jātā. Okāsato nāsāpuṭe pūretvā ṭhitāti. Na cesā ettha sadā sannicitā hutvā tiṭṭhati, kintu? seyyathāpi nāma puriso paduminipatte dadhiṃ bandhitvā heṭṭhā paduminipattaṃ kaṇṭakena vijjheyya atha tena chiddena dadhimatthaṃ galitvā bahi papateyya, evameva yadā sattā rodanti, visabhāgāhārautuvasena vā sañjātadhātukhobhā honti, tato antosīsato pūtisemhabhāvaṃ āpannaṃ matthaluṅgaṃ galitvā tālumatthakavivarena otaritvā nāsāpuṭe pūretvā tiṭṭhati.

Tattha yathā suttikāya pakkhittapūtidadhi na jānāti "ahaṃ suttikāya ṭhitan"ti, napi suttikā jānāti "mayi pūtidadhi ṭhitan"ti, evameva na siṅghānikā jānāti "ahaṃ nāsāpuṭesu saṇṭhitā"ti napi nāsāpuṭā jānanti "amhesu siṅghānikā ṭhitā"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato siṅghānikā siṅghānikabhāgena paricchinnāti vavatthapeti. Ayametissā sabhāgaparicchedo, visabhāgaparicchedo pana kesasadiso evāti evaṃ siṅghānikaṃ vaṇṇādito vavatthapeti.

Tato paraṃ antosarīre lasikā sarīrasandhīnaṃ abbhantare picchilakuṇapaṃ, sā vaṇṇato kaṇṇikāraniyyāsavaṇṇāti vavatthapeti. Saṇṭhānato okāsasaṇṭhānā. Disato dvīsu disāsu jātā. Okāsato aṭṭhisandhīnaṃ abbhañjanakiccaṃ sādhayamānā asītisatasandhīnaṃ abbhantare ṭhitāti. Yassa cesā mandā hoti, tassa uṭṭhahantassa nisīdantassa abhikkamantassa paṭikkamantassa sammiñjentassa pasārentassa aṭṭhīni kaṭakaṭāyanti, accharikāsaddaṃ karonto viya vicarati, ekayojanadviyojanamattampi addhānaṃ gatassa vāyodhātu kuppati, gattāni dukkhanti. Yassa pana cesā bahukā hoti, tassa uṭṭhānanissajjādīsu na aṭṭhīni kaṭakaṭāyanti, dīghampi addhānaṃ gatassa vāyodhātu na kuppati, na gattāni dukkhanti.