4. Anāthapiṇḍikavatthu. (98)

"pāpopi passatī bhadranti imaṃ dhammadesanaṃ satthā jetavane viharanto anāthapiṇḍikaṃ ārabbha kathesi.

Anāthapiṇḍiko hi vihārameva uddissa catupaññāsakoṭidhanaṃ buddhasāsane vikīritvā, satthari jetavane viharante, devasikaṃ tīṇi mahāupaṭṭhānāni gacchati, gacchanto ca "kiṃ nu kho ādāya āgatoti sāmaṇerā vā daharā vā hatthaṃpi me olokeyyunti tucchahattho nāma na gatapubbo, pāto gacchanto yāguṃ gāhāpetvāva gacchati,

Katapātarāso sappinavanītādīni bhesajjāni gāhāpetvā gacchati, sāyaṇhasamaye mālāgandhavilepanavatthādīni gāhāpetvā vihāraṃ gacchati, evaṃ niccakālameva divase divase dānaṃ datvā sīlaṃ rakkhati. Aparabhāge so dhanakkhayaṃ gacchati. Vohārupajīvinopissa hatthato aṭṭhārasakoṭidhanaṃ iṇaṃ gaṇhiṃsu. Kulasantakāpissa aṭṭhārasa hiraññakoṭiyo nadītīre nidahitvā ṭhapitā, udakena kūle bhinne, mahāsamuddaṃ pavisiṃsu. Evamassa anupubbena dhanaṃ parikkhayaṃ agamāsi. So evaṃbhūtopi saṅghassa dānaṃ detiyeva, paṇītaṃ pana katvā dātuṃ na sakkoti. So ekadivasaṃ, satthārā "dīyati pana te gahapati kule dānanti vutte, "dīyati me bhante kule dānaṃ, tañca kho kaṇājakaṃ bilaṅgadutiyanti āha. Atha naṃ satthā "gahapati `lūkhaṃ dānaṃ demīti mā cintayi, cittasmiṃ hi paṇīte buddhādīnaṃ dinnadānaṃ lūkhaṃ nāma natthi, apica tvaṃ gahapati aṭṭhannaṃ ariyapuggalānaṃ dānaṃ desi; ahampana velāmakāle sakalajambudīpaṃ unnaṅgalaṃ katvā mahādānaṃ pavattayamāno tisaraṇagatampi kañci nālatthaṃ, dakkhiṇeyyā nāma evaṃ dullabhā; tasmā `lūkhaṃ me dānanti mā cintayīti vatvā velāmasuttamassa kathesi.