@4 cha.Ma., i. sippikā 5 cha.Ma. samiñjantassa

Tattha yathā akkhaabbhañjanatelaṃ na jānāti "ahaṃ akkhaṃ abbhañjitvā ṭhitan"ti, napi akkho jānāti "maṃ telaṃ abbhañjitvā ṭhitan"ti, evameva na lasikā jānāti "ahaṃ asītisatasandhiyo abbhañjitvā ṭhitā"ti, napi asītisatasandhiyo jānanti "lasikā amhe abbhañjitvā ṭhitā"ti. Ābhogapaccavekkhaṇavirahitā hi ete dhammā .pe. Na puggaloti. Paricchedato lasikā lasikabhāgena paricchinnāti vavatthapeti. Ayametissā sabhāgaparicchedo, visabhāgaparicchedo pana kesasadiso evāti. Evaṃ lasikaṃ vaṇṇādito vavatthapeti.

Tato paraṃ antosarīre muttaṃ vaṇṇato māsakhārodakavaṇṇanti vavatthapeti. Saṇṭhānato udakaṃ pūretvā adhomukhaṭhapitaudakakumbhaabbhantaragataudakasaṇṭhānaṃ. Disato heṭṭhimāya disāya jātaṃ. Okāsato vatthissabbhantare ṭhitanti. Vatthi nāma vatthipuṭo vuccati, yattha seyyathāpi nāma candanikāya pakkhitte adhomukhe pelāghaṭake candanikāraso pavisati, na cassa pavisanamaggo paññāyati, evameva sarīrato muttaṃ pavisati, na cassa pavisanamaggo paññāyati nikkhamanamaggo eva tu pākaṭo hoti, yampi ca muttabharite "passāvaṃ karomā"ti sattānaṃ āyūhanaṃ hoti. Tattha yathā candanikāya pakkhitte adhomukhe pelāghaṭake ṭhito candanikāraso na jānāti "ahaṃ adhomukhe pelāghaṭake ṭhito"ti, napi adhomukho pelāghaṭako jānāti "mayi candanikāraso ṭhito"ti, evameva na muttaṃ jānāti "ahaṃ vatthimhi ṭhitan"ti napi vatthi jānāti "mayi muttaṃ ṭhitan"ti. Ābhogapaccavekkhaṇavirahitā hi ete dhammā .pe. Na puggaloti. paricchedato muttaṃ muttabhāgena paricchinnanti vavatthapeti. Ayametassa sabhāgaparicchedo, visabhāgaparicchedo pana kesasadiso evāti evaṃ muttaṃ vaṇṇādito vavatthapeti. Evamayamimaṃ dvattiṃsākāraṃ vaṇṇādito vavatthapeti.