Etthāha "athānena tato paraṃ kiṃ kātabban"ti? vuccate:- tadeva Nimittaṃ āsevitabbaṃ bhāvetabbaṃ bahulīkātabbaṃ suvavatthitaṃ vavatthapetabbaṃ. Kathaṃ yantaṃ nimittaṃ āsevati bhāveti bahulīkaroti svāvaṭṭhitaṃ vavatthapetīti? ayañhi taṃ kesādīnaṃ koṭṭhāsabhāvena upaṭṭhānanimittaṃ āsevati, satiyā allīyati bhajati upagacchati, bhāveti, satigabbhaṃ gaṇhāpeti. Tattha laddhaṃ vā satiṃ vaḍḍhento taṃ bhāvetīti vuccati. Bahulīkarotīti punappanaṃ satisampayuttaṃ vitakkavicārabbhāhataṃ karoti. Suvavatthitaṃ vavatthapetīti yathā suṭṭhu vavatthitaṃ hoti, na puna antaradhānaṃ gacchati, tathā taṃ satiyā vavatthapeti, upadhāreti upanibandhati.

Athavā yaṃ pubbe anupubbato nātisīghato nātisaṇikato vikkhepap- paṭibāhanato paṇṇattisamatikkamanato anupubbamuñcanato sallakkhaṇato tayo ca suttantāti evaṃ dasavidhaṃ manasikārakosallaṃ vuttaṃ, tattha anupubbato manasikaronto āsevati, nātisīghato nātisaṇikato ca manasikaronto bhāveti, vikkhepappaṭibāhanato manasikaronto bahulīkaroti, paṇṇattisamatikkamanādito manasikaronto suvavatthitaṃ vavatthapetīti veditabboti.

Etthāha "kathampanāyaṃ anupubbādivasena ete dhamme manasikarotī"ti? Vuccate:- ayañhi kese manasikaritvā tadanantaraṃ lome manasikaroti, na nakhe. Tathā lome manasikaritvā tadanantaraṃ nakhe manasikaroti, na dante. Esa nayo sabbattha kasmā? uppaṭipāṭiyā hi manasikaronto seyyathāpi nāma akusalo puriso dvattiṃsapadaṃ nisseṇiṃ uppaṭipāṭiyā ārohanto kilantakāyo tato