"sabbe tasanti daṇḍassa, sabbe bhāyanti maccuno,

attānaṃ upamaṃ katvā na haneyya na ghātayeti.

Tattha sabbe tasantīti: sabbepi sattā, attani daṇḍe patante, tassa daṇḍassa tasanti. Maccunoti: maraṇassāpi bhāyantiyeva. Imissā ca desanāya byañjanaṃ niravasesaṃ, attho pana sāvaseso. Yathā hi raññā "sabbe sannipatantūti bheriyā cārāpitāya rājamahāmatte ṭhapetvā sesā sannipatanti; evameva "sabbe tasantīti vuttepi, "hatthājāneyyo assājāneyyo usabhājāneyyo khīṇāsavoti ime cattāro ṭhapetvā avasesā tasantīti veditabbā. Imesu hi khīṇāsavo sakkāyadiṭṭhiyā pahīnattā maraṇakasattaṃ apassanto na bhāyati, itare tayo sakkāyadiṭṭhiyā balavattā attano paṭipakkhabhūtaṃ sattaṃ apassantā na bhāyanti. Na haneyya na ghātayeti: yathā ahaṃ; evaṃ aññepi sattāti na paraṃ haneyya na hanāpeyyāti attho.

Desanāvasāne bahū sotāpattiphalādīni pāpuṇiṃsūti.