Atha paṇṇattisamatikkamanato te dhamme manasikaroti. Paṇṇattisamatikkamanato hi kesā lomāti evamādivohāraṃ samatakkamitvā vissajjetvā yathūpaṭṭhitānaṃ asubhādīnaṃyeva vasena manasikaroti. Kathaṃ? yathā araññanivāsūpagatā manussā aparicitabhūmibhāgattā udakaṭṭhānasañjānanatthaṃ sākhābhaṅgādīhi nimittaṃ katvā
@i. paṇṇattisamatikkamanatoti Tadanusārena āgantvā udakaṃ paribhuñjanni, yathā pana paricitabhūmibhāgā honti, atha taṃ nimittaṃ vissajjetvāva manasikaritvāva udakaṭṭhānaṃ upasaṅkamitvā udakaṃ paribhuñjanti, evameva kesā lomāti ādinā taṃtaṃvohārassa vasena paṭhamaṃ te dhamme manasākāsi, tesu dhammesu asubhādīnaṃ aññataravasena upaṭṭhahantesu taṃtaṃvohāraṃ samtikkamitvā vissajjetvā asubhāditova manasikaroti.
Etthāha "kathampanassa ete dhammā asubhādito upaṭṭhahanti, kathaṃ vaṇṇato, kathaṃsuññato vā, kathañcāyamete asubhato manasikaroti, kathaṃ vaṇṇato, kathaṃ suññato vā"ti? vuccate kesā tāvassa vaṇṇasaṇṭhānagandhāsayokāsavasena pañcadhā asubhato upaṭṭhahanti, pañcadhā eva cāyamete asubhato manasikaroti. Seyyathīdaṃ? kesā nāmete vaṇṇato asubhā paramapaṭikkūlajegucchā. Tathā hi manussā Divā pānabhojane patitaṃ kesavaṇṇaṃ vākaṃ vā suttaṃ vā disvā kesasaññāya manoramampi pānabhojanaṃ chaḍḍenti vā jigucchanti vā. Saṇṭhānatopi asubhā. Tathā hi rattiṃ pānabhojane patitaṃ kesasaṇṭhānaṃ vākaṃ vā suttaṃ vā chupitvā kesasaññāya manoramampi pānabhojanaṃ chaḍḍenti vā jigucchanti vā. Gandhatopi asubhā. Tathā hi telamakkhanapupphadhūmādiabhisaṅkhārehi virahānaṃ kesānaṃ gandho paramajeguccho hoti, aggimhi pakkhittassa kesassa gandhaṃ ghāyitvā sattā nāsikaṃ pidhenti, mukhampi vikujjenti. Āsayatopi asubhā. Tathā hi nānāvidhena manussā sucinissandena saṅkāraṭṭhāne taṇḍuleyyakādīni viya pittasemhapubbalohita- nissandanato ācitā vuḍḍhiṃ viruḷhiṃ vepululaṃ gamitāti. Okāsatopi asubhā. Tathā hi saṅkāraṭṭhāne viya taṇḍuleyyakādīni paramajegucche lomādiekattiṃsakuṇaparāsimatthake manussānaṃ sīsapaliveṭhake allacamme jānāti. Eseva nayo lomādīsu. Evantāva ayamete dhamme asubhato upaṭṭhahante asubhato manasikaroti.