@9 cha.Ma., i. ayaṃ saddo na dissati Taṃtaṃkasiṇavaseneva cāyamete manasikaroti, evaṃ vaṇṇato upaṭṭhahante vaṇṇato manasikaroti. Yadi panassa suññato upaṭṭhahanti, atha kesā ghanavinibbhogavavatthānena ojaṭṭhamakasamūhavasena upaṭṭhahanti. Tathā lomādayo, yathā upaṭṭhahante cāyamete tatheva manasikaroti. Evaṃ suññato upaṭṭhahante suññato manasikaroti.
Evaṃ manasikaronto cāyamete dhamme anupubbamuñcanato manasikaroti. Anupubbamuñcanato hi asubhādīnaṃ aññataravasena upaṭṭhite kese muñcitvā lome manasikaronto seyyathāpi nāma jalūkā naṅguṭṭhena gahitappadese sāpekkhāva hutvā tuṇḍena aññaṃ padesaṃ gaṇhāti, gahite ca tasmiṃ itaraṃ muñcati, evameva kesesu sāpekkhova hutvā lome manasikaroti, lomesu ca upaṭṭhitesu te manasikaroti kese muñcati. esa nayo sabbattha. Evañhissa anupubbamuñcanato manasikaroto asubhādīsu aññataravasena te dhammā upaṭṭhahantā anavasesato upaṭṭhahanti, pākaṭatarupaṭṭhānā ca honti
atha yassa te dhammā asubhato upaṭṭhahanti, pākaṭatarupaṭṭhānā ca honti, tassa seyyathāpi nāma makkaṭo dvattiṃsatālake tālavane byāmena paripātiyamāno ekarukkhepi asaṇṭhahanto paridhāvitvā yadā nijjhatto hoti kilanto, atha ekameva ghanatālapaṇṇapariveṭhitaṃ tālasūciṃ nissāya tiṭṭhati, evameva cittamakkaṭo dvattiṃsakoṭṭhāsake imasmiṃ kāye teneva yoginā paripātiyamāno ekakoṭṭhāsakepi asaṇṭhahanto paridhāvitvā yadā anekārammaṇavidhāvane abhilāsābhāvena nijjhatto hoti kilanto. Atha yvāssa kesādīsu dhammo paguṇataro caritānurūpataro vā, yattha vā pubbe katādhikāro hoti, taṃ nissāya upacāravasena tiṭṭhati. Atha tameva nimittaṃ punappunaṃ takkāhataṃ vitakkāhataṃ karitvā yathākkamaṃ paṭhamajjhānaṃ uppādeti, tattha patiṭṭhāya vipassanaṃ ārabhitvā ariyabhūmiṃ pāpuṇāti.
Yassa pana te dhammā vaṇṇato upaṭṭhahanti, tassāpi seyyathāpi nāma makkaṭo .pe. Atha yvāssa kesādīsu dhammo paguṇataro caritānurūpataro vā, yattha vā pubbe katādhikāro hoti, taṃ nissāya upacāravasena tiṭṭhati. Atha tameva