"ito ekanavute kappe vipassibuddhakāle bandhumatīnagare ekasmiṃ kule nibbattitvā cintesiṃ `kinnu kho paresaṃ chedanaṃ vā pīḷanaṃ vā akaraṇakammanti upadhārento puññesu ghosanakammaṃ disvā tato paṭṭhāya taṃ kammaṃ karonto mahājanaṃ samādapetvā `puññāni karotha, uposathadivasesu uposathaṃ samādiyatha, dānaṃ detha, dhammaṃ suṇātha; buddharatanādīhi sadisaṃ aññaṃ nāma natthi, tiṇṇaṃ ratanānaṃ sakkāraṃ karothāti ugghosento vicarāmi; tassa mayhaṃ saddaṃ sutvā buddhapitā bandhumo mahārājā maṃ pakkosāpetvā `tāta kiṃ karonto vicarasīti pucchitvā, `deva tiṇṇaṃ ratanānaṃ guṇaṃ pakāsetvā mahājanaṃ puññakammesu samādapento vicarāmīti vutte, `kattha nisinno vicarasīti pucchitvā, `padasāva devāti vutte, `tāta Na tvaṃ evaṃ vicarituṃ arahasi, imaṃ pupphadāmaṃ pilandhitvā assapiṭṭhe nisinno vicarāti mayhaṃ muttādāmasadisaṃ pupphadāmaṃ datvā dantaṃ assaṃ adāsi: atha maṃ raññā dinnaparihārena tatheva ugghosetvā vicarantaṃ punapi rājā pakkosāpetvā `tāta kiṃ karonto vicarasīti pucchitvā, `tadeva devāti vutte, `tāta assopi te nānucchaviko, idha nisīditvā vicarāti catusindhavayuttaṃ rathaṃ adāsi: tatiyavārepi me rājā saddaṃ sutvā pakkosāpetvā `tāta kiṃ karonto vicarasīti pucchitvā, `tadeva devāti vutte, `tāta rathopi te nānucchavikoti mayhaṃ mahantaṃ bhogaṃ mahāpasādhanañca datvā ekaṃ hatthiṃ adāsi: svāhaṃ sabbābharaṇapaṭimaṇḍito hatthikkhandhe nisīditvā asītivassasahassāni dhammaghosakakammaṃ akāsiṃ; tassa me ettakaṃ kālaṃ kāyato candanagandho vāyati, mukhato uppalagandho vāyati; idaṃ mayā katakammanti.

Evaṃ so attano pubbakammaṃ kathetvā ākāse nisinnova tejodhātuṃ samāpajjitvā parinibbāyi. Sarīre jālā uṭṭhahitvā maṃsalohitaṃ jhāpesi. Sumanapupphāni viya dhātuyo avasisiṃsu. Satthā suddhavatthaṃ pasāresi. Dhātuyo tattha patiṃsu. Tā pakkhipitvā cātummahāpathe thūpaṃ kāresi "mahājano vanditvā puññabhāgī bhavissatīti.