Rājakumāropi "pāsādamahaṃ karissāmīti satthāraṃ nimantetvā pāsāde catujjātikagandhehi paribhaṇḍaṃ katvā paṭhamaummārato paṭṭhāya

Celapaṭikaṃ patthari. So kira aputtako, tasmā "sacāhaṃ puttaṃ vā dhītaraṃ vā lacchāmi, satthā imaṃ akkamissatīti cintetvā patthari. So satthari āgate satthāraṃ pañcappatiṭṭhitena vanditvā pattaṃ gahetvā "pavisatha bhanteti āha. Satthā na pāvisi. So dutiyampi tatiyampi yāci. Satthā appavisitvāva ānandattheraṃ olokesi. Thero olokitasaññāyeva vatthānaṃ anakkamanabhāvaṃ ñatvā "saṃhara rājakumāra dussāni, na bhagavā celapaṭikaṃ akkamissati, pacchimaṃ janataṃ tathāgato oloketīti dussāni saṃharāpesi. So dussāni saṃharitvā satthāraṃ anto pavesetvā yāgukhajjakena santappetvā ekamantaṃ nisinno vanditvā āha "ahaṃ bhante tumhākaṃ upaṭṭhāko tikkhattuṃ saraṇaṃ gato: kucchigato ca kiramhi ekavāraṃ saraṇaṃ gato, dutiyampi taruṇadārakakāle, tatiyampi viññubhāvaṃ pattakāle; tassa me kasmā celapaṭikaṃ na akkamitthāti. "kiṃ pana tvaṃ kumāra cintetvā celapaṭikaṃ attharīti. "sace puttaṃ vā dhītaraṃ vā lacchāmi, satthā me celapaṭikaṃ akkamissatīti idaṃ cintetvā bhanteti. "tenāhaṃ kumāra na akkaminti. "kiṃ panāhaṃ bhante puttaṃ vā dhītaraṃ vā neva lacchāmīti. "āma kumārāti. "kiṃkāraṇā bhanteti. "purimattabhāve jāyāya saddhiṃ pamādaṃ āpannattāti. "kismiṃ kāle bhanteti. Athassa satthā atītaṃ āharitvā dassesi:

"atīte kira anekasatā manussā mahatiyā nāvāya samuddaṃ pakkhandiṃsu. Nāvā samuddamajjhe bhijji. Dve jāyapatikā ekaṃ phalakaṃ gahetvā antaradīpakaṃ pavisiṃsu. Sesā sabbe tattheva mariṃsu. Tasmiṃ kho pana dīpake mahāsakuṇasaṅgho vasati. Te aññaṃ khāditabbakaṃ adisvā chātajjhattā sakuṇaṇḍakāni aṅgāre pacitvā khādiṃsu, tesu appahontesu, sakuṇacchāpe gahetvā pacitvā khādiṃsu, tesu appahontesu, sakuṇe gahetvā khādiṃsu, evaṃ paṭhamavayepi majjhimavayepi pacchimavayepi khādiṃsuyeva, ekasmiṃpi vaye appamādaṃ nāpajjiṃsu. Ekopi ca nesaṃ appamādaṃ nāpajji.