Satthā idantassa pubbakammaṃ dassetvā "sace hi tvaṃ kumāra tadā ekasmiṃpi vaye bhariyāya saddhiṃ appamādaṃ āpajjissa, ekasmiṃpi vaye putto vā dhītā vā uppajjeyya; sace pana vo ekopi appamatto abhavissa, taṃ paṭicca putto vā dhītā vā uppajjissa; kumāra attānaṃ hi piyaṃ maññamānena tīsupi vayesu appamattena attā rakkhitabbo, evaṃ asakkontena ekavayepi rakkhitabboyevāti vatvā gāthamāha

"attānañce piyaṃ jaññā rakkheyya naṃ surakkhitaṃ

tiṇṇamaññataraṃ yāmaṃ paṭijaggeyya paṇḍitoti.

Tattha "yāmanti: satthā attano dhammissaratāya ceva desanākusalatāya ca idha tiṇṇaṃ vayānaṃ aññataraṃ vayaṃ yāmanti katvā dasseti. Tasmā evamettha attho veditabbo "sace attānaṃ piyaṃ jāneyya, rakkheyya naṃ surakkhitaṃ; yathā so surakkhito hoti, evantaṃ rakkheyya. Tattha, sace gihī samāno `attānaṃ rakkhissāmīti upari pāsādatale susaṃvutaṃ gabbhaṃ pavisitvā sampannarakkho hutvā Vasantopi; pabbajito hutvā susaṃvute pidahitadvāravātapāne leṇe viharantopi attānaṃ na rakkhatiyeva. Gihī samāno pana yathābalaṃ dānasīlādīni puññāni karonto, pabbajito vā pana vattappaṭivattapariyattimanasikāresu ussukkaṃ āpajjanto attānaṃ rakkhati nāma. Evaṃ tīsu vayesu asakkonto aññatarasmiṃpi vaye paṇḍitapuriso attānaṃ paṭijaggatiyeva. Sace hi gihibhūto paṭhamavaye khiḍḍāpasutatāya kusalaṃ kātuṃ na sakkoti. Majjhimavaye appamattena hutvā kusalaṃ kātabbaṃ. Sace majjhimavaye puttadāraṃ posento kusalaṃ kātuṃ na sakkoti, pacchimavaye kātabbameva. Evaṃpi tena attā paṭijaggito va hoti. Evaṃ akarontassa pana attā piyo nāma na hoti, apāyaparāyanameva naṃ karoti. Sace pana pabbajito paṭhamavaye sajjhāyaṃ karonto dhārento vācento vattappaṭivattaṃ karonto pamādaṃ āpajjati, majjhimavaye appamattena samaṇadhammo kātabbo. Sace pana paṭhamavaye uggahitapariyattiyā aṭṭhakathāvinicchayaṃ kāraṇañca pucchanto majjhimavaye pamādaṃ āpajjati, pacchimavaye appamattena samaṇadhammo kātabbo. Evaṃpi tena attā paṭijaggitova hoti. Evaṃ akarontassa pana attā piyo nāma na hoti, pacchānutāpeneva naṃ tāpetīti.