Dhātīnaṃ adāsi. Nāmaggahaṇadivase cassa "kassapoti nāmaṃ katvā kumāraparihārena vaḍḍhitattā "kumārakassapoti sañjāniṃsu. So kīḷāmaṇḍale dārake paharitvā, "nimmātāpitikenamhā pahaṭāti vutte, rājānaṃ upasaṅkamitvā "deva maṃ `nimmātāpitikoti vadanti, mātaraṃ me ācikkhathāti pucchitvā, raññā dhātiyo dassetvā "imā te mātaroti vutte, "na ettakā mama mātaro, ekāya me mātarā bhavitabbaṃ, taṃ me ācikkhathāti āha. Rājā "na sakkā imaṃ vañcetunti cintetvā "tāta tava mātā bhikkhunī, tvaṃ mayā bhikkhunīupassayā ānītoti. So tāvatakeneva samuppannasaṃvego hutvā "tāta pabbājetha manti āha. Rājā "sādhu tātāti taṃ mahantena sakkārena satthu santike pabbājesi.

So laddhūpasampado "kumārakassapattheroti paññāyi. So satthu santike kammaṭṭhānaṃ gahetvā araññaṃ pavisitvā vāyamitvā visesaṃ nibbattetuṃ asakkonto "puna kammaṭṭhānaṃ visesetvā gahessāmīti satthu santikaṃ āgantvā andhavane vihāsi. Atha naṃ kassapabuddhakāle ekato samaṇadhammaṃ katvā anāgāmiphalaṃ patvā brahmaloke nibbattabhikkhu brahmalokato āgantvā paṇṇarasa pañhe pucchitvā "ime pañhe ṭhapetvā satthāraṃ añño byākātuṃ samattho natthi, gaccha, satthu santike imesaṃ atthaṃ uggaṇhāti uyyojesi. So tathā katvā pañhavissajjanāvasāne arahattaṃ pāpuṇi.

Tassa pana nikkhantadivasato paṭṭhāya dvādasa vassāni mātu bhikkhuniyā akkhīhi assūni pavattayiṃsu. Sā puttaviyogadukkhitā assutinteneva mukhena bhikkhāya caramānā antaravīthiyaṃ theraṃ disvāva "putta puttāti viravantī taṃ gaṇhituṃ upadhāvamānā pavattitvā pati. Sā thanehi khīraṃ muñcantehi uṭṭhahitvā allacīvarā gantvā theraṃ gaṇhi. So cintesi "sacāyaṃ mama santikā madhuravacanaṃ labhissati, vinassissati; thaddhameva katvā imāya saddhiṃ sallapissāmīti. Atha naṃ āha "kiṃ karontī vicarasi? sinehamattaṃpi chindituṃ na Sakkosīti. Sā "aho kakkhaḷā therassa kathāti cintetvā "kiṃ vadesi tātāti vatvā punapi tatheva vuttā cintesi "ahaṃ imassa kāraṇā dvādasa vassāni assūni nivāretuṃ na sakkomi, ayaṃ pana me thaddhahadayo, kiṃ me imināti puttasinehaṃ chinditvā taṃdivasameva arahattaṃ pāpuṇi.