4. Kumārapañhavaṇṇanā

atthuppatti

idāni "ekannāma kin"ti evamādīnaṃ kumārapañhānaṃ atthavaṇṇanākkamo anuppatto. Tesaṃ atthuppattiṃ idha nikkhepappayojanañca vatvā atthavaṇṇanaṃ karissāma:-

atthuppatti tāva tesaṃ sopāko nāma bhagavato mahāsāvako ahosi. Tenāyasmatā jātiyā sattavasseneva aññā ārādhitā, tassa bhagavā pañhābyākaraṇena upasampadaṃ anuññātukāmo attanā adhippetatthānaṃ pañhānaṃ byākaraṇasamatthataṃ pakāsento "ekannāma kin"ti evamādinā pañhe pucchi. So byākāsi, tena ca byākaraṇena bhagavato cittaṃ ārādhesi. Sā ca tassāyasmato upasampadā ahosi.