"mahāsatto rajjasiriṃ pahāya kaṇṭhakaṃ abhiruyha channasahāyo abhinikkhamanto nagaradvāre ṭhitena mārena "siddhattha nivattassu, ito te sattame divase cakkaratanaṃ pātubhavissatīti vutte, "ahaṃpetaṃ māra jānāmi, na pana me tena atthoti āha. "atha kimatthāya nikkhamasīti. "sabbaññutaññāṇatthāyāti. "tenahi sace ajjato paṭṭhāya kāmavitakkādīnaṃ ekaṃpi vitakkaṃ vitakkessasi, jānissāmi te kattabbanti [āha]. So tato paṭṭhāya otārāpekkho satta vassāni mahāsattaṃ anubandhi. Satthāpi chabbassāni dukkarakārikaṃ caritvā paccattaṃ purisakāraṃ nissāya bodhimūle sabbaññutaññāṇaṃ paṭivijjhitvā vimuttisukhaṃ paṭisaṃvedayamāno pañcame sattāhe ajapālanigrodhamūle nisīdi. Tasmiṃ samaye māro "ahaṃ
Ettakaṃ kālaṃ anubandhitvā otārāpekkhopi imassa kiñci khalitaṃ nāddasaṃ, atikkantodāni esa mama visayanti domanassappatto mahāmagge nisīdi. Athassa "taṇhā aratī rāgāti imā tisso dhītaro "pitā no na paññāyati, kahaṃ nukho etarahīti olokayamānā taṃ tathā nisinnaṃ disvā upasaṅkamitvā "kasmā tāta dukkhī dummanosīti pucchiṃsu. So tāsaṃ tamatthaṃ ārocesi. Atha naṃ tā āhaṃsu "tāta mā cintayittha, mayaṃ taṃ attano vase katvā ānessāmāti. "na sakkā ammā esa kenaci vase kātunti. "tāta mayaṃ itthiyo nāma idāneva naṃ rāgapāsādīhi bandhitvā ānessāma, tumhe mā cintayitthāti satthāraṃ upasaṅkamitvā "pāde te samaṇa paricāremāti āhaṃsu. Satthā neva tāsaṃ vacanaṃ manasākāsi, na akkhīni ummīletvā olokesi. Puna māradhītaro "ucacāvaco kho purisānaṃ adhippāyo, kesañci kumārikāsu pemaṃ hoti, kesañci paṭhamavaye ṭhitāsu, kesañci majjhimavaye ṭhitāsu, kesañci pacchimavaye ṭhitāsu; nānappakārehi taṃ palobhissāmāti ekekā kumārikāvaṇṇādivasena sataṃ sataṃ attabhāve abhinimminitvā kumārikāyo avijātā sakiṃvijātā duvijātā majjhimitthiyo mahallakitthiyo ca hutvā chakkhattuṃ bhagavantaṃ upasaṅkamitvā "pāde te samaṇa paricāremāti āhaṃsu. Taṃpi bhagavā na manasākāsi, yathā taṃ anuttare upadhisaṅkhaye adhimuttoti. Atha satthā ettakenāpi tā anugacchantiyo "apetha, kiṃ disvā evaṃ vāyamatha? evarūpaṃ nāma avītarāgānaṃ purato kātuṃ vaṭṭati, tathāgatassa pana rāgādayo pahīnā, kena maṃ kāraṇena attano vase nessathāti vatvā imā gāthā abhāsi