Tattha "yassa jitaṃ nāvajiyatīti: yassa sammāsambuddhassa tena tena maggena jitaṃ rāgādikkilesajātaṃ puna asamudācaraṇato nāvajiyati dujjitaṃ nāma na hoti. Noyātīti: na uyyāti, yassa jitaṃ kilesajātaṃ rāgādīsu koci ekakkilesopi loke pacchato nivatti nāma na hoti, nānubandhatīti attho. Anantagocaranti: anantārammaṇassa sabbaññutaññāṇassa vasena apariyantagocaraṃ. Kena padenāti: yassa rāgapadādīsu ekapadaṃpi natthi, taṃ tumhe kena padena nessatha: buddhassa pana ekapadaṃpi natthi, taṃ apadaṃ buddhaṃ tumhe kena padena nessatha?
@tena padena nessatha.
Dutiyagāthāyaṃ taṇhā nāmesā saṃsibbitaparisibbitapariyonaddhatthena jālamassā atthītipi jālakārikātipi jālūpamātipi jālinī, rūpādīsu ārammaṇesu visattatāya visāhāratāya visapupphatāya visaphalatāya visaparibhogatāya visattikā; sā evarūpā taṇhā yassa kuhiñci bhave netuṃ natthi, taṃ tumhe apadaṃ buddhaṃ kena padena nessathāti attho.