Cha satthāro "amhākaṃ esa anucchaviko, amhākameva naṃ dehīti vadiṃsu. So "ākāsenāgantvā gaṇhāthāti āha. Chaṭṭhe divase niggaṇṭho nāṭaputto antevāsike pesesi "gacchatha, seṭṭhiṃ evaṃ vadetha `amhākaṃ ācariyassa anucchaviko, mā appamattakassa kāraṇā ākāsena āgamanaṃ kari, dehi kiretaṃ pattanti. Te gantvā seṭṭhiṃ tathā vadiṃsu. Seṭṭhī "ākāsenāgantvā gaṇhituṃ samatthova gaṇhātūti āha. Nāṭaputto sayaṃ gantukāmo hutvā antevāsikānaṃ saññamadāsi "ahaṃ ekaṃ hatthañca pādañca ukkhipitvā uppatitukāmo viya bhavissāmi, tumhe maṃ `ācariya kiṃ karotha? dārumayapattassa kāraṇā paṭicchannaṃ arahattaṃ mahājanassa mā dassayitthāti vatvā maṃ hatthesu ca pādesu ca gahetvā ākaḍḍhantā bhūmiyaṃ pāteyyāthāti. So tattha gantvā seṭṭhiṃ āha "mahāseṭṭhi mayhaṃ ayaṃ patto anucchaviko, aññesaṃ nānucchaviko, mā te appamattakassa kāraṇā mama ākāse uppatanaṃ ruccati, dehi me pattanti. "bhante ākāsena uppatitvāva gaṇhāthāti. Tato nāṭaputto "tenahi apetha apethāti antevāsike apanetvā "ākāse uppatissāmīti ekaṃ hatthañca pādañca ukkhipi. Atha naṃ antevāsikā "ācariya kinnāmetaṃ karotha? chavassa dārumayapattassa Kāraṇā paṭicchannagguṇena mahājanassa dassitena ko atthoti taṃ hatthapādesu gahetvā ākaḍḍhitvā bhūmiyaṃ pātesuṃ. So seṭṭhiṃ āha "mahāseṭṭhi ime me uppatituṃ na denti, dehi me pattanti. "uppatitvāva gaṇhātha bhanteti. Evaṃ titthiyā cha divasāni vāyamitvāpi taṃ pattaṃ na labhiṃsuyeva.
Sattame divase āyasmato ca mahāmoggallānassa āyasmato ca piṇḍolabhāradvājassa "rājagahe piṇḍāya carissāmāti gantvā ekasmiṃ piṭṭhipāsāṇe ṭhatvā cīvaraṃ pārupanakāle dhuttakā kathaṃ samuṭṭhāpesuṃ "ambho pubbe cha satthāro `loke mayaṃ arahantamhāti vadiṃsu. Rājagahaseṭṭhino pana pattaṃ ussāpetvā `sace arahā atthi, ākāsenāgantvā gaṇhātūti vadantassa ajja sattamo divaso, ekopi `ahaṃ arahāti ākāse uppatanto nāma natthi; ajja no loke arahantānaṃ natthibhāvo ñātoti. Taṃ kathaṃ sutvā āyasmā mahāmoggallāno āyasmantaṃ piṇḍolabhāradvājaṃ āha "sutante āvuso bhāradvāja imesaṃ vacanaṃ, ime buddhasāsanaṃ pariggaṇhantā viya vadanti; tvañca mahiddhiko mahānubhāvo, gacchetaṃ pattaṃ ākāsenāgantvā gaṇhāhīti. "āvuso moggallāna tvaṃ iddhimantānaṃ aggo, tvaṃ etaṃ gaṇhāhi; tayi pana aggaṇhante ahaṃ gaṇhissāmīti. "gaṇhāvusoti evaṃ vutte āyasmā piṇḍolabhāradvājo abhiññāpādakaṃ catutthajjhānaṃ samāpajjitvā vuṭṭhāya tigāvutaṃ piṭṭhipāsāṇaṃ pādantena paricchindanto tūlapicu Viya ākāse uṭṭhāpetvā rājagahanagarassa upari sattakkhattuṃ anupariyāyi. So tigāvutappamāṇassa nagarassa pidhānaṃ viya paññāyi. Nagaravāsino "pāsāṇo no avattharitvā gaṇhātīti bhītā suppādīni matthake katvā tattha tattha nilīyiṃsu. Sattame vāre thero piṭṭhipāsāṇaṃ bhinditvā attānaṃ dassesi. Mahājano theraṃ disvā "bhante piṇḍolabhāradvāja tava pāsāṇaṃ daḷhaṃ katvā gaṇha, mā no sabbe nāsayīti. Thero pāsāṇaṃ pādantena khipitvā vissajjesi. So gantvā yathāṭhāneyeva patiṭṭhāsi. Thero seṭṭhissa gehamatthake aṭṭhāsi. Taṃ disvā seṭṭhī urena nippajjitvā, "otaratha sāmīti vatvā ākāsato otiṇṇaṃ theraṃ nisīdāpetvā. Pattaṃ otārāpetvā catummadhurapuṇṇaṃ katvā therassa adāsi. Thero pattaṃ gahetvā vihārābhimukho pāyāsi. Athassa ye araññe gatā vā gāmagatā vā pāṭihāriyaṃ na passiṃsu, te sannipatitvā "bhante amhākaṃpi pāṭihāriyaṃ dassehīti theraṃ anubandhiṃsu. So tesaṃ tesaṃ pāṭihāriyaṃ dassento vihāraṃ agamāsi.