Satthā taṃ anubandhitvā unnadantassa mahājanassa saddaṃ sutvā "ānanda kasseso saddoti pucchitvā "bhante piṇḍolabhāradvājena ākāse uppatitvā candanapatto gahito, tassa santike eso saddoti sutvā piṇḍolabhāradvājaṃ pakkosāpetvā "saccaṃ kira tayā evaṃ katanti pucchitvā "saccaṃ bhanteti vutte, "kasmā te bhāradvāja evaṃ katanti theraṃ vigarahitvā taṃ pattaṃ khaṇḍākhaṇḍaṃ bhedāpetvā bhikkhūnaṃ añjanapiṃsanatthāya dāpetvā pāṭihāriyassa Akaraṇatthāya sāvakānaṃ sikkhāpadaṃ paññapesi. Titthiyāpi "samaṇo kira gotamo taṃ pattaṃ bhedāpetvā pāṭihāriyassa akaraṇatthāya sāvakānaṃ sikkhāpadaṃ paññapesīti sutvā "samaṇassa gotamassa sāvakā paññattaṃ sikkhāpadaṃ jīvitahetupi nātikkamanti, samaṇopi gotamo taṃ rakkhissateva, idāni amhehi okāso laddhoti nagaravīthīsu ārocentā vicariṃsu, "mayaṃ attano guṇaṃ rakkhantā pubbe dārumayapattassa kāraṇā attano guṇaṃ mahājanassa na dassayimhā, samaṇassa gotamassa sāvakā pattassa kāraṇā attano guṇaṃ mahājanassa dassesuṃ, samaṇo gotamo attano paṇḍitatāya taṃ pattaṃ bhedāpetvā sāvakānaṃ sikkhāpadaṃ paññapesi, idāni mayaṃ teneva saddhiṃ pāṭihāriyaṃ karissāmāti vadiṃsu. Rājā bimbisāro taṃ kathaṃ sutvā satthu santikaṃ gantvā "tumhehi kira bhante pāṭihāriyassa akaraṇatthāya sāvakānaṃ sikkhāpadaṃ paññattanti. "āma mahārājāti. "idāni titthiyā `tumhehi saddhiṃ pāṭihāriyaṃ karissāmāti vadanti, kindāni karissathāti. "tesu karontesu karissāmi mahārājāti. "nanu tumhehi sikkhāpadaṃ paññattanti. "nāhaṃ mahārāja attano sikkhāpadaṃ paññapesiṃ, tameva sāvakānaṃ paññattanti. "tumhe ṭhapetvā aññattha sikkhāpadaṃ paññattaṃ nāma hoti bhanteti. "tenahi mahārāja tamevettha paṭipucchissāmi, atthi pana te mahārāja vijite uyyānanti. "atthi bhanteti. "sace te mahārāja uyyāne mahājano ambādīni khādeyya, kimassa kattabbanti. "daṇḍo bhanteti. "tvaṃ pana khādituṃ labhasīti. "āma bhante, mayhaṃ daṇḍo natthi, ahaṃ attano santakaṃ khādituṃ labhāmīti. "mahārāja yathā tava tiyojanasatike rajje āṇā pavattati, attano uyyāne ambādīni khādantassa daṇḍo natthi, aññesaṃ pana atthi; evaṃ mamapi cakkavāḷakoṭisatasahasse āṇā pavattati, attano sikkhāpadappaññattiyā atikkamo nāma natthi, aññesaṃ pana atthi; karissāmahaṃ pāṭihāriyanti. Titthiyā taṃ kathaṃ sutvā "idānimha naṭṭhā, samaṇena kira gotamena sāvakānaññeva sikkhāpadaṃ paññattaṃ, na attano; sayameva kira pāṭihāriyaṃ kattukāmo; kinnu kho karomāti mantayiṃsu. Rājā satthāraṃ pucchi "bhante kadā pāṭihāriyaṃ karissathāti. "ito cātummāsaccayena āsāḷhapuṇṇamāyaṃ mahārājāti. "kattha karissatha bhanteti. "sāvatthiṃ nissāya mahārājāti. "kasmā pana satthā evaṃ dūraṭṭhānaṃ apadisatīti. "yasmā taṃ sabbabuddhānaṃ mahāpāṭihāriyakaraṇaṭṭhānaṃ; apica mahājanassa sannipātatthāyapi dūraṭṭhānameva apadisatīti. Titthiyā taṃ kathaṃ sutvā "ito kira catunnaṃ māsānaṃ accayena samaṇo gotamo sāvatthiyaṃ pāṭihāriyaṃ karissati, idāni taṃ amuñcitvāva anubandhissāma, mahājano amhe disvā `kimidanti pucchissati, athassa vakkhāma `mayaṃ `samaṇena gotamena saddhiṃ pāṭihāriyaṃ karissāmāti vadimhā, so palāyati, mayamassa palāyituṃ adatvā anubandhāmāti. Satthā rājagahe piṇḍāya caritvā nikkhami. Titthiyāpissa pacchatova nikkhamitvā bhattakiccaṭṭhāne vasanti. Vasitaṭṭhāne punadivase Pātarāsaṃ karonti. Te manussehi "kimidanti pucchitā heṭṭhā vuttanayeneva ārocenti. Mahājanopi "pāṭihāriyaṃ passissāmāti anubandhi. Satthā anupubbena sāvatthiṃ pāpuṇi. Titthiyāpi tena saddhiṃyeva gantvā upaṭṭhāke samādapetvā satasahassaṃ labhitvā khadiratthambhehi maṇḍapaṃ kāretvā nīluppalehi chādāpetvā "idha pāṭihāriyaṃ karissāmāti nisīdiṃsu. Atha rājā pasenadikosalo satthāraṃ upasaṅkamitvā "bhante titthiyehi maṇḍapo kārito, ahaṃpi tumhākaṃ maṇḍapaṃ kāremīti. "alaṃ mahārāja, atthi mayhaṃ maṇḍapakārakoti. "bhante maṃ ṭhapetvā ko añño kātuṃ sakkhissatīti. "sakko devarājāti. "kahaṃ pana bhante pāṭihāriyaṃ karissathāti. "gaṇḍāmbarukkhamūle mahārājāti. Titthiyā "ambarukkhamūle kira pāṭihāriyaṃ karissatīti sutvā attano upaṭṭhākānaṃ ārocetvā yojanabbhantare ṭhāne antamaso tadahujātaṃpi ambapotakaṃ uppāṭāpetvā araññe khipāpesuṃ.