Satthā āsāḷhapuṇṇamīdivase antonagaraṃ pāvisi. Rañño uyyānapālo gaṇḍo nāma ekaṃ piṅgalakipillikehi katapattapuṭassa antare mahantaṃ ambapakkaṃ disvā tassa gandharasalobhena sampatante vāyase palāpetvā rañño atthāya ādāya gacchanto antarāmagge satthāraṃ disvā cintesi "rājā imaṃ ambaṃ khāditvā mayhaṃ aṭṭha vā soḷasa vā kahāpaṇe dadeyya, taṃ me ekasmiṃ attabhāve jīvitavuttiyā nālaṃ; sace panāhaṃ satthu imaṃ dassāmi, Apariyantaṃ me kālaṃ hitāvahaṃ bhavissatīti. So taṃ ambaṃ satthu upanāmesi.
Satthā ānandattheraṃ olokesi. Athassa thero cātummahārājadattiyaṃ pattaṃ nīharitvā hatthe ṭhapesi. Satthā pattaṃ upanāmetvā ambaṃ paṭiggahetvā tattheva nisīdanākāraṃ dassesi. Thero cīvaraṃ paññapetvā adāsi. Athassa tasmiṃ nisinnassa thero pānīyaṃ parissāvetvā taṃ ambapakkaṃ madditvā pānakaṃ katvā adāsi. Satthā ambapānakaṃ pivitvā gaṇḍaṃ āha "imaṃ ambaṭṭhiṃ idheva paṃsuṃ viyūhitvā ropehīti. So tathā akāsi. Satthā tassa upari hatthaṃ dhovi. Hatthe dhotamatteyeva naṅgalasīsamattakkhandho hutvā anupubbena paṇṇāsahattho ambarukkho uṭṭhahi. Catūsu disāsu ekekā uddhaṃ ekāti pañca mahāsākhā paṇṇāsapaṇṇāsahatthāva ahesuṃ. So tāvadeva pupphaphalasampanno hutvā ekasmiṃ ṭhāne paripakkaambapiṇḍidharo ahosi. Pacchato āgacchantā bhikkhū ambapakkāni khādantāyeva āgamiṃsu. Rājā "evarūpo kira ambarukkho uṭṭhitoti sutvā "mā naṃ koci chindīti ārakkhaṃ ṭhapesi. So pana gaṇḍena ropitattā "gaṇḍāmbarukkhotveva paññāyi. Dhuttakāpi ambapakkāni khāditvā "are duṭṭhatitthiyā `samaṇo gotamo gaṇḍāmbarukkhamūle pāṭihāriyaṃ karissatīti tumhehi yojanabbhantare tadahujātāpi ambapotakā uppāṭāpitā, gaṇḍāmbo nāma ayanti vatvā te ucchiṭṭhaambaṭṭhīhi pahariṃsu. Sakko vātavalāhakadevaputtaṃ Āṇāpesi "titthiyānaṃ maṇḍapaṃ vātehi uppāṭetvā ukkārabhūmiyaṃ khipāpehīti. So tathā akāsi. Suriyadevaputtaṃ āṇāpesi "suriyamaṇḍalaṃ niggaṇhanto tāpehīti. Sopi tathā akāsi. Puna vātavalāhakaṃ āṇāpesi "vātamaṇḍalaṃ uṭṭhāpento yāhīti. So tathā karonto titthiyānaṃ paggharitasedasarīre rajavaṭṭiyo okiri. Te tāmbavammikasadisā ahesuṃ. Vassavalāhakaṃpi āṇāpesi "mahantāni mahantāni bindūni pātehīti. So tathā akāsi. Atha nesaṃ kāyo kabaragāvīsadiso ahosi. Te niggaṇā hutvā sammukhasammukhaṭṭhāneyeva palāyiṃsu. Evaṃ palāyantesu pūraṇakassapassa upaṭṭhāko eko kassako "idāni me ayyānaṃ pāṭihāriyakaraṇavelā, taṃ pāṭihāriyaṃ passissāmīti goṇe vissajjetvā pātova ābhataṃ yāgukuṭañceva yottañca gahetvā āgacchanto pūraṇaṃ tathā palāyantaṃ disvā "bhante ahaṃ `ayyānaṃ pāṭihāriyaṃ passissāmīti āgacchāmi, tumhe kahaṃ gacchathāti, "kinte pāṭihāriyena, imaṃ me kuṭañca yottañca dehīti. So tena dinnaṃ kuṭañca yottañca ādāya nadītīraṃ gantvā kuṭaṃ yottena attano gīvāyaṃ bandhitvā rahade patitvā udakabubbuḷake uṭṭhāpento kālaṃ katvā avīcimhi nibbatti. Satthā ākāse ratanacaṅkamaṃ māpesi. Tassa ekā koṭi pācīnacakkavāḷamukhavaṭṭiyaṃ ahosi, ekā pacchimacakkavāḷamukhavaṭṭiyaṃ. Satthā sannipatitāya chattiṃsayojanāya parisāya vaḍḍhamānakacchāyāya "idāni pāṭihāriyakaraṇavelāti