Gandhakuṭito nikkhamitvā pamukhe aṭṭhāsi.
Atha naṃ gharaṇī nāma nandamātā ekā anāgāmiupāsikā upasaṅkamitvā "bhante mādisāya dhītari vijjamānāya tumhākaṃ kilamanakiccaṃ natthi, ahaṃ pāṭihāriyaṃ karissāmīti āha. "kathaṃ karissasi gharaṇīti. "bhante ekasmiṃ cakkavāḷagabbhe mahāpaṭhaviṃ udakaṃ katvā udakasakuṇikā viya nimujjitvā pācīnacakkavāḷamukhavaṭṭiyaṃ attānaṃ dassessāmi, tathā pacchimauttaradakkhiṇacakkavāḷamukhavaṭṭiyaṃ, tathā majjhe; atha mahājanā maṃ disvā, `kā esāti vutte, vakkhanti `gharaṇī nāmesā, ayaṃ tāva ekissā itthiyā ānubhāvo, buddhānaṃ ānubhāvo pana kīdiso bhavissatīti; evaṃ titthiyā tumhe adisvāva palāyissantīti. Atha naṃ satthā "jānāmi te gharaṇi evarūpaṃ pāṭihāriyaṃ kātuṃ samatthabhāvaṃ, na panāyaṃ tavatthāya baddho mālāpuṭoti vatvā paṭikkhipi. Sā "na me satthā anujānāti, addhā mayā uttaritaraṃ pāṭihāriyaṃ kātuṃ samattho añño atthīti ekamantaṃ aṭṭhāsi. Satthāpi "evameva tesaṃ guṇo pākaṭo bhavissatīti "evaṃ chattiṃsayojanāya parisāya majjhe sīhanādaṃ nadissantīti maññamāno aparepi pucchi "tumhe kathaṃ pāṭihāriyaṃ karissathāti. Te "evañca evañca karissāma bhanteti satthu purato ṭhitāva sīhanādaṃ nadiṃsu. Tesu kira cullaanāthapiṇḍiko "mādise anāgāmiupāsake putte vijjamāne satthu kilamanakiccaṃ natthīti cintetvā "ahaṃ bhante pāṭihāriyaṃ Karissāmīti vatvā "kathaṃ karissasīti puṭṭho āha "ahaṃ bhante dvādasayojanikaṃ brahmattabhāvaṃ nimminitvā imissā parisāya majjhe mahāmeghagajjitasadisena saddena brahmaappoṭhanaṃ nāma appoṭhessāmi, mahājanā `kiṃsaddo nāmesoti pucchitvā `cullaanāthapiṇḍikassa kira brahmaappoṭhanasaddo nāmāti vakkhanti, titthiyā `gahapatikassa tāva eso ānubhāvo, buddhānubhāvo kīdiso bhavissatīti tumhe adisvāva palāyissantīti. Satthā "jānāmi te ānubhāvanti tassāpi tatheva vatvā pāṭihāriyakaraṇaṃ nānujāni. Athekā paṭisambhidappattā sattavassikā vīrasāmaṇerī nāma satthāraṃ vanditvā "ahaṃ bhante pāṭihāriyaṃ karissāmīti āha. "kathaṃ karissasi vīreti. "bhante sineruñca cakkavāḷapabbatañca himavantañca āharitvā imasmiṃ ṭhāne paṭipāṭiyā ṭhapetvā ahaṃ haṃsasakuṇī viya tato tato nikkhamitvā asajjamānā gamissāmi, mahājano maṃ disvā `kā esāti pucchitvā `vīrasāmaṇerīti vakkhati, titthiyā `sattavassikāya tāya sāmaṇeriyā ayamānubhāvo, buddhānubhāvo kīdiso bhavissatīti tumhe adisvāva palāyissantīti. Ito paraṃ evarūpāni vacanāni vuttānusāreneva veditabbāni. Tassāpi bhagavā "jānāmi te ānubhāvanti vatvā pāṭihāriyakaraṇaṃ nānujāni. Atheko paṭisambhidappatto khīṇāsavo cundasāmaṇero nāma jātiyā sattavasso satthāraṃ upasaṅkamitvā vanditvā "ahaṃ