Bhante pāṭihāriyaṃ karissāmīti vatvā "kathaṃ karissasīti puṭṭho āha "ahaṃ bhante jambudīpassa dhajabhūtaṃ mahājamburukkhaṃ khandhe gahetvā cāletvā mahājambuphalāni āharitvā imaṃ parisaṃ khādāpessāmi, pāricchattakakusumāni ca āharitvā tumhe vandissāmīti. Satthā "jānāmi te ānubhāvanti vatvā tassāpi pāṭihāriyakaraṇaṃ paṭikkhipi. Atha uppalavaṇṇā therī satthāraṃ vanditvā "ahaṃ bhante pāṭihāriyaṃ karissāmīti vatvā "kathaṃ karissasīti puṭṭhā āha "ahaṃ bhante samantā dvādasayojanaṃ parisaṃ dassetvā āvaṭṭato chattiṃsayojanāya parisāya parivuto cakkavattirājā hutvā āgantvā tumhe vandissāmīti. Satthā "jānāmi te ānubhāvanti vatvā tassāpi pāṭihāriyakaraṇaṃ paṭikkhipi. Atha mahāmoggallānatthero bhagavantaṃ vanditvā "ahaṃ bhante pāṭihāriyaṃ karissāmīti vatvā "kathaṃ karissasīti puṭṭho āha "ahaṃ bhante sinerupabbatarājaṃ dantantare ṭhapetvā sāsapavījaṃ viya naṃ khādissāmīti. "aññaṃ kiṃ karissasīti. "imaṃ mahāpaṭhaviṃ kaṭasārakaṃ viya saṃvellitvā aṅgulantare nikkhipissāmīti. "aññaṃ kiṃ karissasīti. "mahāpaṭhaviṃ kulālacakkaṃ viya parivattetvā mahājanaṃ paṭhavojaṃ khādāpessāmīti. "aññaṃ kiṃ karissasīti. "vāmahatthe paṭhaviṃ katvā ime satte dakkhiṇahatthena aññasmiṃ dīpe ṭhapessāmīti. "aññaṃ kiṃ karissasīti. "sineruṃ chattadaṇḍaṃ katvā mahāpaṭhaviṃ ukkhipitvā tassupari ṭhapetvā chattahattho bhikkhu viya ekahatthenādāya ākāse caṅkamissāmīti. Satthā "jānāmi te ānubhāvanti tassāpi pāṭihāriyakaraṇaṃ nānujāni. So "jānāti maññe satthā mayā uttaritaraṃ pāṭihāriyaṃ kātuṃ samatthanti ekamantaṃ aṭṭhāsi.

Atha naṃ satthā "nāyaṃ moggallāna tavatthāya baddho mālāpuṭo, ahaṃ hi asamadhuro, mama dhuraṃ añño vahituṃ samattho nāma natthi; anacchariyañcetaṃ, yaṃ idāni mama dhuraṃ vahituṃ samattho na bhaveyya; ahetukatiracchānayoniyaṃ nibbattakālepi mama dhuraṃ añño vahituṃ samattho nāhosiyevāti vatvā "kadā pana bhanteti therena puṭṭho atītaṃ āharitvā