"katamaṃ tathāgatassa yamakappāṭihāriye ñāṇaṃ? idha tathāgato Yamakappāṭihāriyaṃ karoti asādhāraṇaṃ sāvakehi; uparimakāyato aggikkhandho pavattati, heṭṭhimakāyato udakadhārā pavattati; heṭṭhimakāyato aggikkhandho pavattati, uparimakāyato udakadhārā pavattati; puratthimakāyato, pacchimakāyato; pacchimakāyato, puratthimakāyato; dakkhiṇakkhito, vāmakkhito; vāmakkhito, dakkhiṇakkhito; dakkhiṇakaṇṇasotato vāmakaṇṇasotato; vāmakaṇṇasotato, dakkhiṇakaṇṇasotato; dakkhiṇanāsikasotato, vāmanāsikasotato; vāmanāsikasotato, dakkhiṇanāsikasotato; dakkhiṇaaṃsakūṭato, vāmaaṃsakūṭato; vāmaaṃsakūṭato, dakkhiṇaaṃsakūṭato; dakkhiṇahatthato, vāmahatthato; vāmahatthato, dakkhiṇahatthato; dakkhiṇapassato, vāmapassato; vāmapassato, dakkhiṇapassato; dakkhiṇapādato, vāmapādato; vāmapādato, dakkhiṇapādato; aṅgulīhi, aṅgulantarikāhi; aṅgulantarikāhi, aṅgulīhi; ekekalomakūpato aggikkhandho pavattati, ekekalomato udakadhārā pavattati; ekekalomato aggikkhandho pavattati, ekekalomakūpato udakadhārā pavattati; channaṃ vaṇṇānaṃ nīlānaṃ pītakānaṃ lohitakānaṃ odātānaṃ mañjeṭṭhānaṃ pabhassarānaṃ; bhagavā caṅkamati, nimmito tiṭṭhati vā nisīdati vā seyyaṃ vā kappeti; .pe. Nimmito seyyaṃ kappeti, bhagavā caṅkamati vā tiṭṭhati vā nisīdati vā, Idaṃ tathāgatassa yamakappāṭihāriye ñāṇanti.
Idaṃ pana pāṭihāriyaṃ satthā tasmiṃ caṅkame caṅkamitvā akāsi. "tassa tejokasiṇasamāpattivasena uparimakāyato aggikkhandho pavattati, āpokasiṇasamāpattivasena heṭṭhimakāyato udakadhārā pavattati; puna udakadhārāya pavattaṭṭhānato aggikkhandho pavattati, aggikkhandhassa ca pavattaṭṭhānato udakadhārā pavattatīti tamatthaṃ dassetuṃ "heṭṭhimakāyato uparimakāyatoti vuttaṃ. Esa nayo sabbapadesu. Aggikkhandho panettha udakadhārāya asammisso ahosi, tathā udakadhārā aggikkhandhena. Ubhayaṃpi kira cetaṃ yāva brahmalokā uggantvā cakkavāḷamukhavaṭṭiyaṃ pavattati. "../../bdpicture/channaṃ vaṇṇānanti vuttattā panassa chabbaṇṇaraṃsiyo kuṭehi āsiñcamānaṃ vilīnasuvaṇṇaṃ viya yantanāḷikato nikkhantā suvaṇṇarasadhārā viya ca ekacakkavāḷagabbhato uggantvā brahmalokaṃ āhacca paṭinivattitvā cakkavāḷamukhavaṭṭimeva gaṇhiṃsu. Ekaṃ cakkavāḷagabbhaṃ vaṅkagopānasivinaddhaṃ viya bodhigharaṃ ahosi ekālokaṃ. Taṃ divasaṃ satthā caṅkamitvā pāṭihāriyaṃ karonto antarantarā mahājanassa dhammakathaṃ kathesi, kathento ca janaṃ nirassāsaṃ akatvā assāsataraṃ deti. Tasmiṃ khaṇe mahājano sādhukāraṃ pavattesi. Tassa sādhukārappavattanakāle satthā tāvamahatiyā parisāya cittaṃ olokento ekekassa soḷasannaṃ ākārānaṃ vasena cittavāraṃ