@idha pana nāmapadena, "atīva assāsanti yuttataraṃ. Ma. assāsavāraṃ. Aññāsi. Evaṃ lahukaparivattaṃ buddhānaṃ cittaṃ. Yo yo yasmiṃ dhamme yasmiñca pāṭihāriye pasanno, tassa tassa ajjhāsayavasena dhammañca kathesi pāṭihāriyañca akāsi. Evaṃ dhamme desiyamāne pāṭihāriye ca kariyamāne mahājanassa dhammābhisamayo ahosi. Satthā pana tasmiṃ samāgame attano manaṃ gahetvā aññaṃ pañhaṃ pucchituṃ samatthaṃ adisvā nimmitabuddhaṃ māpesi. Tena pucchitaṃ pañhaṃ satthā vissajjesi. Satthārā pucchitaṃ so vissajjesi. Bhagavato caṅkamanakāle nimmito ṭhānādīsu aññataraṃ kappesi. Nimmitassa caṅkamanakāle bhagavā ṭhānādīsu aññataraṃ kappesi. Tamatthaṃ dassetuṃ "nimmito caṅkamati vātiādi vuttaṃ. Evaṃ karontassa satthu pāṭihāriyaṃ disvā dhammakathañca sutvā tasmiṃ samāgame vīsatiyā pāṇakoṭīnaṃ dhammābhisamayo ahosi.
Satthā pāṭihāriyaṃ karonto va "kattha nu kho atītabuddhā imaṃ pāṭiheraṃ katvā vassaṃ upentīti āvajjitvā "tāvatiṃsabhavane vassaṃ upagantvā mātu abhidhammapiṭakaṃ desentīti disvā dakkhiṇapādaṃ ukkhipitvā yugandharamatthake ṭhapetvā itaraṃ pādaṃ ukkhipitvā sinerumatthake ṭhapesi. Evaṃ aṭṭhasaṭṭhiyojanasatasahassaṭṭhāne tayo padavārā ahesuṃ. Dve pādacchiddāni pakatipādavītiharaṇasadisanikkhepāni ahesuṃ. "satthā pādaṃ pasāretvā akkamīti na sallakkhetabbaṃ. Tassa hi pādaṃ ukkhipanakāleyeva te pabbatā pādamūlaṃ āgantvā sampaṭicchiṃsu, satthārā akkantakāle uṭṭhāya yathāṭhāne aṭṭhaṃsu. Sakko satthāraṃ disvā cintesi "paṇḍukambalasilāya majjhe satthā imaṃ Vassāvāsaṃ upessati, bahūnaṃ vata devatānaṃ upakāro bhavissati, satthari panettha vassaṃ upagate aññā devatā hatthaṃpi ṭhapetuṃ na sakkhissanti; ayaṃ kho pana paṇḍukambalasilā dīghato saṭṭhiyojanā tiriyato paññāsayojanā puthulato paṇṇarasayojanā satthari nisinnepi tucchā viya bhavissatīti. Satthā tassa ajjhāsayaṃ viditvā attano saṅghāṭiṃ silātalaṃ paṭicchādayamānaṃ khipi. Sakko cintesi "cīvaraṃ tāva paṭicchādayamānaṃ khipi, sayaṃ pana parittake ṭhāne nisīdissatīti. Satthā tassajjhāsayaṃ viditvā nīcapīṭhakaṃ mahāpaṃsukūliko viya paṇḍukambalasilaṃ antocīvarabhogeyeva katvā nisīdi. Mahājanopi taṃkhaṇaññeva satthāraṃ olokento nāddasa. Candassa aṭṭhaṅgamitakālo viya ahosi, suriyassa aṭṭhaṅgamitakālo viya ca ahosi. Mahājano