"gato nu cittakūṭaṃ vā kelāsaṃ vā yugandharaṃ,

na no dakkhemu sambuddhaṃ lokajeṭṭhaṃ narāsabhanti imaṃ gāthaṃ vadanto paridevi. Apare "satthā nāma vivekarato, so `evarūpāya me parisāya evarūpaṃ pāṭiheraṃ katanti lajjāya aññaṃ raṭṭhaṃ vā janapadaṃ vā gato bhavissati; nadāni taṃ dakkhissāmāti paridevantā imaṃ gāthamāhaṃsu

"pavivekarato dhīro nimaṃ lokaṃ punehiti,

na no dakkhemu sambuddhaṃ lokajeṭṭhaṃ narāsabhanti. Te mahāmoggallānaṃ pucchiṃsu "kahaṃ bhante satthāti. So sayaṃ jānantopi "paresaṃpi guṇo pākaṭo hotūti ajjhāsayena "anuruddhaṃ pucchathāti Āha. Te theraṃ tathā pucchiṃsu "kahaṃ bhante satthāti. "tāvatiṃsabhavane paṇḍukambalasilāyaṃ vassaṃ upagantvā mātu abhidhammapiṭakaṃ desituṃ gatoti. "kadā āgamissati bhanteti. "tayo māse abhidhammapiṭakaṃ desetvā mahāpavāraṇādivaseti. Te "satthāraṃ adisvā na gamissāmāti tattheva khandhāvāraṃ katvā vasiṃsu. Ākāsameva kira nesaṃ chadanaṃ ahosi, tāvamahatiyā parisāya sarīranissando nāma na paññāyi. Paṭhavī vivaraṃ adāsi. Sabbattha parisuddhameva bhūmitalaṃ ahosi. Satthā paṭhamameva mahāmoggallānaṃ avoca "moggallāna tvaṃ etissā parisāya dhammaṃ deseyyāsi, cullaanāthapiṇḍiko āhāraṃ dassatīti. Tasmā taṃ temāsaṃ cullaanāthapiṇḍikova tassā parisāya sāyapātaṃ sabbakāle yāgubhattakhādanīyatambulagandhamālāpilandhanāni adāsi. Mahāmoggallāno dhammaṃ desesi pāṭihāriyaṃ daṭṭhuṃ āgatāgatehi puṭṭhe pañhe vissajjesi.