payirupāsanti sambuddhaṃ vasantaṃ nagamuddhani,

na koci devo vaṇṇena sambuddhassa virocati,

sabbe deve atikkamma sambuddho va virocatīti. Evaṃ sabbadevatā attano sarīrappabhāya abhibhavitvā nisinnassa panassa mātā tusitavimānato āgantvā dakkhiṇapasse nisīdi. Indakopi devaputto āgantvā dakkhiṇapasseyeva nisīdi. Aṅkuro vāmapasse. So mahesakkhāsu devatāsu sannipatitāsu apagantvā dvādasayojanike ṭhāne okāsaṃ labhi. Indako tattheva nisīdi. Satthā te ubhopi oloketvā attano sāsane dakkhiṇeyyapuggalānaṃ dinnadānassa mahapphalabhāvaṃ ñāpetukāmo evamāha "aṅkura tayā dīghamantare dasavassasahassaparimāṇakāle dvādasayojanikaṃ uddhanapantiṃ katvā mahādānaṃ dinnaṃ, tvaṃdāni mama samāgamaṃ āgantvā sabbadūre dvādasayojanike ṭhāne okāsaṃ labhi; kiṃ nukho ettha kāraṇanti. Vuttaṃpi cetaṃ

"oloketvāna sambuddho aṅkurañcāpi indakaṃ