Tesu dakkhiṇapasse suvaṇṇasopāṇaṃ devānaṃ ahosi, vāmapasse rajatasopāṇaṃ mahābrahmānaṃ, majjhe maṇisopāṇaṃ tathāgatassa. Satthā sinerumuddhani ṭhatvā devorohaṇe yamakappāṭihāriyaṃ katvā uddhaṃ olokesi, yāva brahmalokā ekaṅgaṇāni ahesuṃ; adho olokesi, yāva avīcito ekaṅgaṇaṃ ahosi; disāvidisā olokesi, anekāni cakkavāḷasatasahassāni ekaṅgaṇāni ahesuṃ; devā manusse passiṃsu. Manussāpi deve passiṃsu. Sabbe sammukhāva passiṃsu. Bhagavā chabbaṇṇaraṃsiyo vissajjesi. Taṃ divasaṃ buddhasiriṃ oloketvā chattiṃsayojanaparimaṇḍalāya parisāya ekopi buddhabhāvaṃ appaṭṭhento nāma nāhosi. Suvaṇṇasopāṇena devā otariṃsu, rajatasopāṇena mahābrahmāno; maṇisopāṇena sammāsambuddho otari. Pañcasikho gandhabbadevaputto beḷuvapaṇḍuvīṇaṃ ādāya dakkhiṇapasse ṭhatvā satthu gandhabbapūjaṃ karonto otari. Mātalisaṅgāhako vāmapasse ṭhatvā dibbagandhamālāpupphaṃ gahetvā namassamāno pūjaṃ katvā otari. Mahābrahmā chattaṃ dhāresi, suyāmo vālavījaniṃ. Satthā iminā parivārena saddhiṃ otaritvā saṅkassanagaradvāre patiṭṭhahi. Sārīputtattheropi āgantvā satthāraṃ vanditvā, yasmā tena tathārūpāya buddhasiriyā otaranto satthā ito pubbe na diṭṭhapubbo, tasmā

"na me diṭṭho ito pubbe na suto uda kassaci

evaṃ vaggugado satthā tusitā gaṇimāgatoti

Ādīhi attano tuṭṭhiṃ pakāsetvā "ajja bhante sabbepi devamanussā tumhākaṃ pihayanti paṭṭhentīti āha. Atha naṃ satthā "sārīputta evarūpehi guṇehi samannāgatā buddhā nāma devamanussānaṃ piyā hontiyevāti vatvā dhammaṃ desento imaṃ gāthamāha