Sabbabuddhānaṃ kira avijahitameva yamakappāṭihāriyaṃ katvā devaloke vassaṃ vasitvā saṅkassanagaradvāre otaraṇaṃ. Tattha pana dakkhiṇapādassa patiṭṭhitaṭṭhānaṃ acalacetiyaṭṭhānaṃ nāma hoti. Satthā tattha ṭhito puthujjanādīnaṃ visayesu pañhe pucchi. Puthujjanā attanova visaye pañhaṃ vissajjetvā sotāpannassa visaye Pañhaṃ vissajjetuṃ nāsakkhiṃsu. Tathā sakadāgāmiādīnaṃ visaye sotāpannādayo. Mahāmoggallānassa visaye sesamahāsāvakā. Sārīputtattherassa visaye mahāmoggallāno. Buddhavisaye sārīputtattheropi vissajjetuṃ nāsakkhiyeva. So pācīnadisaṃ ādiṃ katvā sabbadisā olokesi. Sabbattha ekaṅgaṇameva ahosi. Aṭṭhasu disāsu devamanussā uddhaṃ yāva brahmalokā heṭṭhā ca bhummaṭṭhakā yakkhanāgasupaṇṇā añjaliṃ paggahetvā "bhante idha etassa pañhassa vissajjento nāma natthi, ettheva upadhārethāti āhaṃsu.

Satthā "sārīputto kilamati, kiñcāpi hi esa

`ye ca saṅkhātadhammā se ye ca sekhā puthū idha

tesaṃ me nipako iriyaṃ puṭṭho pabrūhi mārisāti imaṃ buddhavisaye puṭṭhapañhaṃ sutvā `satthā maṃ sekhāsekhānaṃ āgamanappaṭipadaṃ pucchatīti pañhe nikkaṅkho, `khandhādīsu pana katarena nu kho mukhena imaṃ paṭipadaṃ kathento ahaṃ satthu ajjhāsayaṃ gaṇhituṃ sakkhissāmīti mama ajjhāsayaṃ kaṅkhati; so mayā naye adinne kathetuṃ na sakkhissati, nayamassa dassāmīti nayaṃ dassento "bhūtamidaṃ sārīputta samanupassāhīti āha. Evaṃ kirassa ahosi "sārīputto mama ajjhāsayaṃ gahetvā kathento khandhavasena kathessatīti. Therassa saha nayadānena so pañho nayasatena nayasahassena upaṭṭhāsi. So satthārā dinnanaye ṭhatvā taṃ pañhaṃ