Kathesi. Ṭhapetvā kira sammāsambuddhaṃ añño sārīputtattherassa paññaṃ pāpuṇituṃ samattho nāma natthi. Teneva kira thero satthu purato ṭhatvā sīhanādaṃ nadi "ahaṃ bhante sakalakappaṃpi deve vassante `ettakāni bindūni mahāsamudde patitāni, ettakāni bhūmiyaṃ, ettakāni pabbateti gaṇetvā lakkhaṃ āropetuṃ samatthoti. Satthāpi naṃ "jānāmi te sārīputta gaṇetuṃ samatthabhāvanti āha. Tassa āyasmato paññāya upamā nāma natthi. Tenevamāha

"gaṅgāya vālukā khīye udakaṃ khīye mahaṇṇave

mahiyā mattikā khīye lakkhena mama buddhiyāti.

Idaṃ vuttaṃ hoti "sace hi bhante buddhisampanna lokanātha mayā ekasmiṃ pañhe vissajjite ekaṃ vā vālukaṃ ekaṃ vā udakabinduṃ ekaṃ vā paṃsukhaṇḍaṃ pakkhipitvā pañhānaṃ sate vā sahasse vā satasahasse vā vissajjite gaṅgāya vālukādīsu ekekaṃ ekamante khipeyya, khippataraṃ gaṅgādīsu vālukādayo parikkhayaṃ gaccheyyuṃ; na tveva mama pañhānaṃ vissajjanaṃ khīyatīti.