Tassattho "kāmoghādinā catubbidhena oghena bālo vuyhati, taṃ oghaṃ paṇḍito sammappadhānasaṅkhātena yogena nudati. So sabbehi kāmayogādīhi visaṃyutto yogakkhemī nāma vuccatīti.

Uttaro imaṃ paṭigītaṃ gaṇhantova sotāpattiphale patiṭṭhahi. So sotāpanno hutvā taṃ gāthaṃ ādāya gantvā "ambho mayā gītappaṭigītaṃ āhaṭaṃ, okāsaṃ me dethāti vatvā nirantaraṃ ṭhitassa mahājanassa majjhe jannunāva akkamanto agamāsi. Nāgamāṇavikā pitu phaṇe ṭhatvā naccamānā "kiṃ su adhipatī rājāti gītaṃ gāyi. Uttaro "../../bdpicture/chadvārādhipatī rājāti paṭigītaṃ gāyi. Puna nāgamāṇavikā "kenassu vuyhatī bāloti tassa paṭigītaṃ gāyi. Athassā paṭigītaṃ gāyanto uttaro "oghena vuyhatī bāloti imaṃ gāthamāha. Nāgarājā taṃ sutvāva buddhassa uppannabhāvaṃ ñatvā "mayā ekaṃ buddhantaraṃ evarūpaṃ padannāma na sutapubbaṃ, uppanno vata bho loke buddhoti tuṭṭhamānaso naṅguṭṭhena udakaṃ pahari. Mahāvīciyo uṭṭhahiṃsu. Ubho tīrāni bhijjiṃsu. Ito cito ca usabhamatte ṭhāne manussā udake nimujjiṃsu. So ettakaṃ mahājanaṃ phaṇe ṭhapetvā ukkhipitvā thale patiṭṭhapesi. So uttaraṃ upasaṅkamitvā "kahaṃ sāmi satthāti pucchi. "ekasmiṃ rukkhamūle nisinno mahārājāti. So "ehi sāmi gacchāmāti uttarena saddhiṃ agamāsi. Mahājanopi tena saddhiṃyeva gato. Nāgarājā gantvā chabbaṇṇānaṃ rasmīnaṃ antaraṃ pavisitvā satthāraṃ vanditvā rodamāno aṭṭhāsi. Atha naṃ satthā āha "kimidaṃ mahārājāti. "ahaṃ bhante tumhādisassa buddhassa sāvako hutvā vīsativassasahassāni samaṇadhammaṃ akāsiṃ, sopi maṃ samaṇadhammo nitthāretuṃ nāsakkhi, appamattakaṃ erakapattacchindanamattaṃ nissāya ahetukappaṭisandhiṃ gahetvā urena parisakkanaṭṭhāne nibbattomhi, ekaṃ buddhantaraṃ neva manussattaṃ labhāmi, na saddhammassavanaṃ, na tumhādisassa buddhassa dassananti. Satthā tassa kathaṃ sutvā "mahārāja manussattaṃ nāma dullabhameva, tathā saddhammassavanaṃ, tathā buddhuppādo; idañhi