Kicchena kasirena labbhatīti vatvā dhammaṃ desento imaṃ gāthamāha

"kiccho manussappaṭilābho, kicchaṃ maccānajīvitaṃ,

kicchaṃ saddhammassavanaṃ, kiccho buddhānamuppādoti.

Tassattho "mahantena hi vāyāmena mahantena kusalena laddhattā manussappaṭilābho nāma kiccho dullabho, nirantaraṃ kasikammādīni katvā jīvitavuttiṃ ghaṭanatopi parittatāyapi maccānaṃ jīvitaṃpi kicchaṃ, anekesupi kappesu dhammadesakassa puggalassa dullabhatāya saddhammassavanaṃpi kicchaṃ, mahantena pana vāyāmena abhinīhārassa samijjhanato samiddhābhinīhārassa ca anekehipi kappakoṭisahassehi dullabhuppādato buddhānaṃ uppādopi kicchoyeva ativiya dullabhoti.