"sabbapāpassa akaraṇanti imaṃ dhammadesanaṃ satthā jetavane viharanto ānandattherassa pañhaṃ ārabbha kathesi.

Thero kira divāṭṭhāne nisinno cintesi "satthārā sattannaṃ buddhānaṃ `mātāpitaro āyuparicchedo bodhi sāvakasannipāto aggasāvakā upaṭṭhākoti sabbaṃ kathitaṃ, uposatho pana akathito; kinnu kho tesaṃpi ayameva uposatho aññoti. So satthāraṃ upasaṅkamitvā tamatthaṃ pucachi. Yasmā pana tesaṃ buddhānaṃ kālabhedova ahosi, na gāthābhedo; vipassī sammāsambuddho hi sattame sattame saṃvacchare uposathaṃ akāsi, ekadivasaṃ dinnovādoyeva hissa sattannaṃ saṃvaccharānaṃ alaṃ ahosi; sikhī ca vessabhū ca chaṭṭhe chaṭṭhe saṃvacchare uposathaṃ kariṃsu, kakusandho ca konāgamano ca saṃvacchare saṃvacchare, kassapadasabalo chaṭṭhe chaṭṭhe māse uposathaṃ akāsi, ekadivasaṃ dinanovādoyeva hissa channaṃ māsānaṃ alaṃ ahosi; tasmā satthā tesaṃ imaṃ kālabhedaṃ ārocetvā "ovādagāthā pana nesaṃ imāyevāti vatvā sabbesaṃ ekameva uposathaṃ āvikaronto imā gāthā abhāsi

"sabbapāpassa akaraṇaṃ kusalassūpasampadā

sacittapariyodapanaṃ etaṃ buddhānasāsanaṃ.