Yo cāti: idaṃ akkhemaṃ anuttamaṃ saraṇaṃ dassetvā khemaṃ uttamaṃ saraṇaṃ dassanatthaṃ āraddhaṃ. Tassattho "yo ca gahaṭṭho vā pabbajito vā `itipi so bhagavā arahaṃ sammāsambuddhotiādikaṃ buddhadhammasaṅghānussatikammaṭṭhānaṃ nissāya seṭṭhavasena buddhañca dhammañca saṅghañca saraṇaṃ gato, tassāpi taṃ saraṇagamanaṃ Aññatitthiyavandanādīhi kuppati calati, tassa pana acalabhāvaṃ dassetuṃ maggena āgatasaraṇameva pakāsento `cattāri ariyasaccāni sammappaññāya passatīti āha. Yo hi etesaṃ saccānaṃ dassanavasena etāni saraṇaṃ gato, tassa etaṃ saraṇaṃ khemañca uttamañca, so ca puggalo etaṃ saraṇaṃ paṭicca sakalasmāpi vaṭṭadukkhā pamuccati; tasmā "etaṃ kho saraṇaṃ khemantiādi vuttanti.

Desanāvasāne sabbepi te isayo saha paṭisambhidāhi arahattaṃ patvā satthāraṃ vanditvā pabbajjaṃ yāciṃsu. Satthā cīvarabbhantarato hatthaṃ pasāretvā "etha bhikkhavo, caratha brahmacariyanti āha. Taṃkhaṇaññeva aṭṭhaparikkhāradharā vassasatikattherā viya ahesuṃ. So ca sabbesaṃpi aṅgamagadhakururaṭṭhavāsīnaṃ sakkāraṃ ādāya āgamanadivaso ahosi. Te sakkāraṃ ādāya āgatā sabbepi te isayo pabbajite disvā "kinnu kho amhākaṃ aggidattabrāhmaṇo mahā udāhu samaṇo gotamoti cintetvā "samaṇassa gotamassa āgatattā aggidattova mahāti amaññiṃsu. Satthā tesaṃ ajjhāsayaṃ oloketvā "aggidatta parisāya kaṅkhaṃ chindāti āha. So "ahaṃpi ettakameva paccāsiṃsāmīti iddhibalena sattakkhattuṃ vehāsaṃ abbhuggantvā punappunaṃ oruyha satthāraṃ vanditvā "satthā me bhante bhagavā, sāvakohamasmīti vatvā sāvakattaṃ pakāsesīti.

Aggidattapurohitavatthu.

7. Ānandattherassapañhavatthu. (154)