tasmā piyaṃ na kayirātha, piyāpāyo hi pāpako,

ganthā tesaṃ na vijjanti, yesaṃ natthi piyāpiyanti.

Tattha "ayogeti: ayuñjitabbe ayonisomanasikāre. Vesiyāgocarādibhedassa hi chabbidhassa agocarassa sevanaṃ idha ayonisomanasikāro nāma, tasmiṃ ayonisomanasikāre attānaṃ yuñjantoti attho. Yogasminti: tabbiparite ca yonisomanasikāre ayuñjanto. Atthaṃ hitvāti: pabbajitakālato paṭṭhāya adhisīlādisikkhāttayaṃ attho nāma, taṃ atthaṃ hitvā. Piyaggāhīti: pañcakāmaguṇasaṅkhātaṃ piyameva gaṇhanto. Pihetattānuyoginanti: tāya paṭipattiyā sāsanato cuto gihibhāvaṃ patvā pacchā, ye attānuyogaṃ anuyuñjantā sīlādīni sampādetvā devamanussānaṃ santikā sakkāraṃ labhanti, tesaṃ piheti "aho vatāhaṃpi evarūpo assanti icchatīti attho. Mā piyehīti: piyehi sattehi vā saṅkhārehi vā kudācanaṃ ekakkhaṇaṃpi na samāgaccheyya, tathā appiyehi. Kiṃkāraṇā? piyānaṃ hi viyogavasena adassanaṃ appiyānañca upasaṅkamanavasena dassanaṃ dukkhaṃ. Tasmāti: yasmā idaṃ ubhayaṃpi dukkhaṃ, tasmā kañci sattaṃ vā saṅkhāraṃ vā piyaṃ nāma na kareyya. Piyāpāyoti: piyehi apāyo viyogo. Pāpakoti: lāmako. Ganthā tesaṃ na vijjantīti: yesaṃ piyaṃ natthi, tesaṃ abhijjhā kāyagantho pahīyati; yesaṃ appiyaṃ natthi, Tesaṃ byāpādo kāyagantho pahīyati; tesu pana dvīsu pahīnesu sesaganthāpi pahīnā nāma honti; tasmā piyaṃ vā appiyaṃ vā na kātabbanti attho.

Desanāvasāne bahū sotāpattiphalādīni pāpuṇiṃsu. Te pana tayo janā "mayaṃ vinā bhavituṃ na sakkomāti vibbhamitvā gehameva agamaṃsūti.