Anitthigandhakumāravatthu.
6. Aññatarabrāhmaṇavatthu. (170)
"taṇhāya jāyateti imaṃ dhammadesanaṃ satthā jetavane viharanto aññataraṃ brāhmaṇaṃ ārabbha kathesi.
So kira micchādiṭṭhiko ekadivasaṃ nadītīraṃ gantvā khettaṃ sodheti. Satthā tassa upanissayasampattiṃ disvā tassa santikaṃ agamāsi. So satthāraṃ disvāpi sāmīcikammaṃ akatvāva tuṇhī ahosi. Atha naṃ satthā puretaraṃ ālapitvā "brāhmaṇa kiṃ karosīti āha. "khettaṃ bho gotama sodhemīti. Satthā ettakameva vatvā gato, punadivasepi tassa khettaṃ kasituṃ āgatassa santikaṃ gantvā "brāhmaṇa kiṃ karosīti pucchitvā "khettaṃ kasāmi bho gotamāti sutvā pakkāmi, punadivasādīsupi tatheva gantvā pucchitvā "bho gotama khettaṃ vapāmi niddhemi rakkhāmīti sutvā pakkāmi. Atha naṃ ekadivasaṃ brāhmaṇo āha "bho gotama tvaṃ khettaṃ sodhanadivasato paṭṭhāya āgato, sace me sassaṃ sampajjissati, tuyhaṃpi saṃvibhāgaṃ karissāmi, tuyhaṃ adatvā sayaṃ na khādissāmi; itodāni paṭṭhāya tvaṃ mama sahāyoti. Athassa aparena samayena sassaṃ sampajji. Tassa "sampannaṃ me sassaṃ, svedāni lāyāpessāmīti lāyanatthaṃ katasabbakiccassa rattiṃ mahāmegho vassitvā sabbaṃ sassaṃ hari. Khettaṃ tacchetvā ṭhapitasadisaṃ ahosi. Satthā pana paṭhamadivasaṃyeva "taṃ sassaṃ na sampajjissatīti aññāsi. Brāhmaṇo pātova "khettaṃ olokessāmīti gato tucchaṃ khettaṃ disvā uppannabalavasoko cintesi "samaṇo gotamo mama khettaṃ sodhanakālato paṭṭhāya āgato, ahaṃpi taṃ `imasmiṃ sasse nipphanne tuyhaṃpi saṃvibhāgaṃ karissāmi, tuyhaṃ adatvā sayaṃ na khādissāmi, itodāni tvaṃ mama sahāyoti avacaṃ, sopi me manoratho matthakaṃ na pāpuṇīti. So āhārupacchedaṃ katvā mañcake nipajji. Athassa satthā gehadvāraṃ agamāsi. So satthu āgamanaṃ sutvā "sahāyaṃ me ānetvā idha nisīdāpethāti āha. Parijano tathā akāsi. Satthā nisīditvā "kahaṃ brāhmaṇoti pucchitvā, "gabbhe nipannoti vutte, "pakkosatha nanti pakkosāpetvā, āgantvā ekamantaṃ nisinnaṃ āha "kiṃ brāhmaṇāti. "bho gotama tumhe mama khettaṃ sodhanadivasato paṭṭhāya āgatā, ahaṃpi `sasse nipphanne tumhākaṃpi saṃvibhāgaṃ karissāmīti avacaṃ, so me manoratho na nipphanno, tena me soko uppanno, bhattaṃpi me nacchādetīti. Atha naṃ satthā "jānāsi pana brāhmaṇa `kinte nissāya soko uppannoti pucchitvā, "na jānāmi bho gotama, tvaṃ pana jānāsīti vutte, "āma brāhmaṇa, uppajjamāno hi soko vā bhayaṃ vā taṇhaṃ nissāya uppajjatīti vatvā imaṃ gāthamāha