Vatvā bhikkhusaṅghaṃ ādāya ekasmiṃ rukkhamūle chāyāya nisīdi. Dārakā mahākassapattheraṃ pacchato āgacchantaṃ disvā uppannasinehā pītivegena paripuṇṇasarīrā hutvā pacchiyo otāretvā theraṃ pañcappatiṭṭhitena vanditvā pūve pacchīhi saddhiṃyeva ukkhipitvā "gaṇhatha bhanteti theraṃ vadiṃsu. Atha ne thero āha "esa satthā bhikkhusaṅghaṃ gahetvā rukkhamūle nisinno, tumhe deyyadhammaṃ ādāya gantvā bhikkhusaṅghassa saṃvibhāgaṃ karothāti. Te "sādhu bhanteti nivattitvā therena saddhiṃyeva gantvā pūve datvā olokayamānā ekamante ṭhatvā paribhogāvasāne udakaṃ adaṃsu. Bhikkhū ujjhāyiṃsu "dārakehi mukholokanena bhikkhā dinnā, sammāsambuddhaṃ vā mahāthere vā pūvehi apucchitvā mahākassapattheraṃ disvā pūve pacchīhi saddhiṃyeva ādāya āgamiṃsūti. Satthā tesaṃ kathaṃ sutvā "bhikkhave mama puttena mahākassapena sadiso bhikkhu devamanussānaṃ piyo hoti, tassa catuppaccayapūjaṃ karontiyevāti vatvā imaṃ gāthamāha

"sīladassanasampannaṃ dhammaṭṭhaṃ saccavādinaṃ

attano kammakubbānaṃ taṃ jano kurute piyanti.

Tattha sīladassanasampannanti: catuppārisuddhisīlena ceva maggaphalasampayuttena ca sammādassanena sampannaṃ. Dhammaṭṭhanti: navavidhe lokuttaradhamme ṭhitaṃ, sacchikatalokuttaradhammanti attho. Saccavādinanti: catunnaṃ saccānaṃ soḷasahākārehi sacchikatattā saccaññāṇena saccavādinaṃ. Attano kammakubbānanti: attano Kammaṃ nāma tisso sikkhā, tā pūrayamānanti attho. Taṃ janoti: taṃ puggalaṃ lokiyamahājano piyaṃ karoti daṭṭhukāmo vanditukāmo catuppaccayena pūjetukāmo hotiyevāti attho.