"cirappavāsinti imaṃ dhammadesanaṃ satthā isipatane viharanto nandiyaṃ ārabbha kathesi.

Bārāṇasiyaṃ kira saddhāsampannassa kulassa nandiyo nāma putto ahosi. So mātāpitūnaṃ anurūpo saddhāsampanno saṅghupaṭṭhāko va ahosi. Athassa mātāpitaro vayappattakāle sammukhagehato mātuladhītaraṃ revatiṃ nāma ānetukāmā ahesuṃ. Sā pana assaddhā adānasīlā, nandiyo taṃ na icchi. Athassa mātā revatiṃ āha "amma tvaṃ imasmiṃ gehe bhikkhusaṅghassa nisajjanaṭṭhānaṃ upalimpitvā āsanāni paññāpehi, ādhārake ṭhapehi, bhikkhūnaṃ āgatakāle patte gahetvā nisīdāpetvā dhammakarakena pānīyaṃ parissāvetvā bhuttakāle patte dhova; evaṃ me puttassa ārādhikā bhavissatīti. Sā tathā akāsi. Atha naṃ "ovādakkhamā jātāti puttassa ārocetvā, tena "sādhūti sampaṭicchite, divasaṃ ṭhapetvā āvāhaṃ kariṃsu. Atha naṃ nandiyo āha "sace bhikkhusaṅghañca mātāpitaro ca me upaṭṭhahissasi, evaṃ imasmiṃ gehe vatthuṃ labhissasi, appamattā hohīti. Sā "sādhūti paṭissuṇitvā katipāhaṃ saddhā viya hutvā upaṭṭhahantī dve putte vijāyi. Nandiyassapi mātāpitaro kālamakaṃsu. Gehe sabbissariyaṃ tassāyeva ahosi. Nandiyopi mātāpitūnaṃ

Kālakiriyato paṭṭhāya mahādānapati hutvā bhikkhusaṅghassa dānaṃ paṭṭhapesi, kapaṇaddhikādīnaṃpi gehadvāre pākavattaṃ paṭṭhapesi. So aparabhāge satthu dhammadesanaṃ sutvā āvāsadāne ānisaṃsaṃ sallakkhetvā isipatane mahāvihāre catūhi gabbhehi paṭimaṇḍitaṃ catussālaṃ kāretvā mañcapīṭhādīni attharāpetvā taṃ āvāsaṃ niyyādento buddhappamukhassa bhikkhusaṅghassa dānaṃ datvā tathāgatassa dakkhiṇodakaṃ adāsi. Satthu dakkhiṇodakappatiṭṭhānena saddhiṃyeva tāvatiṃsadevaloke sabbadisāsu dvādasayojaniko uddhaṃ yojanasatubbedho sattaratanamayo nārīgaṇasampanno dibbappāsādo uggacchi.

Athekadivasaṃ mahāmoggallānatthero devacārikaṃ gantvā tassa pāsādassa avidūre ṭhito attano santikaṃ āgate devaputte pucchi "kasseso accharāgaṇaparipuṇṇo dibbappāsādo nibbattoti. Athassa te devaputtā vimānasāmikaṃ ācikkhantā āhaṃsu "bhante yena nandiyena nāma gahapatiputtena isipatane satthu vihāro kāretvā dinno, tassatthāya etaṃ vimānaṃ nibbattanti. Accharāsaṅghopi naṃ disvā pāsādato otaritvā āha "bhante mayaṃ `nandiyassa paricārikā bhavissāmāti idha nibbattā, taṃ pana apassantā ativiya ukkaṇṭhitamha; mattikapātiṃ bhinditvā suvaṇṇapātiṃ gahaṇasadisaṃ hi manussasampattiṃ hitvā dibbasampattiṃ gahaṇaṃ, idhāgamanatthāya naṃ vadeyyāthāti. Thero tato āgantvā satthāraṃ upasaṅkamitvā pucchi "nibbattati nu kho bhante manussaloke ṭhitānaññeva Katakalyāṇānaṃ dibbasampattīti. "moggallāna nanu te devaloke nandiyassa nibbattā dibbasampatti sāmaṃ diṭṭhā, kasmā maṃ pucchasīti. "evaṃ bhante nibbattatīti. Atha naṃ satthā "moggallāna kiṃ nāmetaṃ kathesi; yathā hi cirappavutthaṃ puttaṃ vā bhātaraṃ vā pavāsato āgacchantaṃ gāmadvāre ṭhito kocideva disvā vegena gehaṃ āgantvā `asuko nāma āgatoti āroceyya, athassa ñātakā haṭṭhappahaṭṭhā vegena nikkhamitvā `āgatosi tāta, āgatosi tātāti taṃ abhinandeyyuṃ; evameva idha katakalyāṇaṃ itthiṃ vā purisaṃ vā imaṃ lokaṃ hitvā paralokaṃ gataṃ dasavidhaṃ dibbapaṇṇākāraṃ ādāya `ahaṃ purato, ahaṃ puratoti paccuggantvā devatā abhinandantīti vatvā imā gāthā abhāsi