taṃ nāmarūpasmimasajjamānaṃ,

akiñcanaṃ nānutapanti dukkhāti.

Tattha "kodhanti: sabbākāraṃpi kodhaṃ navavidhaṃpi mānaṃ jaheyya. Saṃyojananti: kāmarāgasaṃyojanādikaṃ dasavidhaṃpi sabbaṃ saṃyojanaṃ atikkameyya. Asajjamānanti: alaggamānaṃ. Yo hi "mama rūpaṃ, mama vedanātiādinā nayena nāmarūpaṃ gaṇhāti, tasmiñca bhijjamāne socati vihaññati; ayaṃ nāmarūpasmiṃ sajjati nāma; evaṃ aggaṇhanto pana na sajjati nāma; taṃ puggalaṃ evaṃ asajjamānaṃ rāgādīnaṃ abhāvena akiñcanaṃ dukkhā nāma nānupatantīti attho.

Desanāvasāne bahū sotāpattiphalādīni pāpuṇiṃsu. Rohiṇīpi sotāpattiphale patiṭṭhahi. Taṃkhaṇaṃyevassā sarīraṃ suvaṇṇavaṇṇaṃ ahosi. Sā tato cutā tāvatiṃsabhavane catunnaṃ devaputtānaṃ sīmantare nibbattitvā pāsādikā rūpasobhaggappattā ahosi. Cattāropi devaputtā taṃ disvā uppannasinehā hutvā "mama sīmāya anto nibbattā, mama sīmāya anto nibbattāti vivadantā sakkassa devarañño santikaṃ gantvā "deva imaṃ no nissāya aṭṭo uppanno, taṃ vinicchinathāti āhaṃsu. Sakkopi taṃ oloketvāva uppannasineho hutvā evamāha "imāya vo diṭṭhakālato paṭṭhāya kathaṃ cittāni uppannānīti; atheko āha "mama tāva uppannaṃ cittaṃ saṅgāmabheri viya sannisīdituṃ nāsakkhīti. Dutiyo "mama cittaṃ pabbatanadī viya sīghaṃ pavattatiyevāti. Tatiyo "mama imissā diṭṭhakālato paṭṭhāya kakkaṭakassa viya akkhīni nikkhamiṃsūti. Catuttho "mama cittaṃ cetiye ussāpitaddhajo viya niccalaṃ ṭhātuṃ nāsakkhīti. Atha ne sakko āha "tātā tumhākaṃ tāva cittāni pasayharūpāni; ahaṃ pana imaṃ labhanto jīvissāmi, alabhantassa me maraṇaṃ bhavissatīti. Devaputtā "mahārāja tumhākaṃ maraṇena attho natthīti taṃ sakkassa vissajjetvā pakkamiṃsu. Sā sakkassa piyā ahosi manāpā. "asukakīḷaṃ nāma gacchāmāti vutte, sakko tassā vacanaṃ paṭikkhipituṃ nāsakkhiyevāti.