Satthārā hi bhikkhusaṅghassa senāsane anuññāte rājagahaseṭṭhiādīhi senāsanesu kāriyamānesu eko āḷaviko bhikkhu attano senāsanaṃ karonto ekaṃ manāpaṃ rukkhaṃ disvā chindituṃ ārabhi. Tattha pana nibbattā ekā taruṇaputtā devatā puttaṃ aṅkenādāya ṭhitā yāci "mā me sāmi vimānaṃ chinda, na sakkhissāmi puttakaṃ ādāya anāvāsā vicaritunti. So "ahaṃ aññattha īdisaṃ rukkhaṃ na labhissāmīti tassā vacanaṃ anādayi. Sā "imaṃ tāva dārakaṃ oloketvā oramissatīti puttaṃ rukkhasākhāya ṭhapesi. Sopi bhikkhu ukkhittapharasuṃ sandhāretuṃ asakkonto dārakassa bāhuṃ chindi. Devatā uppannabalavakodhā "paharitvā naṃ māressāmīti ubho hatthe ukkhipitvā evantāva cintesi "ayaṃ bhikkhu sīlavā, sacāhaṃ imaṃ māressāmi, nirayagāminī bhavissāmi: sesadevatāpi attano rukkhaṃ chindante bhikkhū disvā `asukadevatāya evannāma mārito bhikkhūti maṃpi pamāṇaṃ katvā bhikkhū māressantīti; ayañca sassāmiko [bhikkhu], sāmikasseva naṃ kathessāmīti ukkhitte hatthe apanetvā rodamānā satthu santikaṃ gantvā vanditvā ekamantaṃ aṭṭhāsi. Atha naṃ satthā "kiṃ devateti āha. Sā "bhante Tumhākameva sāvakena idaṃ nāma kataṃ, ahaṃpi taṃ māretukāmā hutvā idaṃ nāma cintetvā amāretvāva idhāgatāti sabbantaṃ pavattiṃ vitthārato ārocesi. Satthā taṃ sutvā "sādhu sādhu devate, sādhu te kataṃ evaṃ uppannaṃ kodhaṃ bhantaṃ rathaṃ viya niggayhamānāyāti vatvā imaṃ gāthamāha

"yo ve uppatitaṃ kodhaṃ rathaṃ bhantaṃva dhāraye,

tamahaṃ sārathiṃ brūmi, rasmiggāho itaro janoti.

Tattha "uppatitanti: uppannaṃ. Rathaṃ bhantaṃ vāti: yathā nāma cheko sārathi ativegena dhāvantaṃ rathaṃ niggaṇhitvā yathicchakaṃ ṭhapesi; evaṃ yo puggalo uppannaṃ kodhaṃ dhāraye niggaṇhituṃ sakkoti. Tamahanti: taṃ ahaṃ sārathiṃ brūmi. Itaro janoti: itaro pana rājauparājādīnaṃ rathasārathi jano rasmiggāho nāma hoti na uttamasārathīti.