Cīvarakaṇṇo tiṇesu pavattento ussāvabindūhi temi. Brāhmaṇo taṃ disvā "imaṃ ṭhānaṃ appaharitaṃ kātuṃ vaṭṭatīti punadivase kuddālaṃ ādāya gantvā taṃ ṭhānaṃ tacchetvā khalamaṇḍalasadisaṃ akāsi. Punadivasepi taṃ ṭhānaṃ āgantvā, bhikkhūsu cīvaraṃ pārupantesu, ekassa cīvarakaṇṇaṃ bhūmiyaṃ patitvā paṃsumhi pavattamānaṃ disvā "idha vālukaṃ okirituṃ vaṭṭatīti cintetvā vālukaṃ āharitvā okiri. Athekadivasaṃ purebhattaṃ caṇḍo ātapo ahosi. Tadāpi bhikkhūnaṃ cīvaraṃ pārupantānaṃ gattato sede muñcante disvā "idha mayā maṇḍapaṃ kāretuṃ vaṭṭatīti cintetvā maṇḍapaṃ kāresi. Punekadivasaṃ pāto va vaddalikā ahosi. Tadāpi barāhmaṇo bhikkhū olokento, tintacīvarake bhikkhū disvā "ettha mayā sālaṃ kāretuṃ vaṭṭatīti sālaṃ kāretvā "idāni sālamahaṃ karissāmīti cintetvā, buddhappamukhaṃ bhikkhusaṅghaṃ nimantetvā anto ca bahi ca bhikkhū nisīdāpetvā dānaṃ datvā, bhattakiccāvasāne anumodanatthāya satthu pattaṃ gahetvā "bhante ahaṃ bhikkhūnaṃ cīvarapārupanakāle imasmiṃ ṭhāne olokento ṭhito, idañcidañca disvā idañcidañca kāresinti ādito paṭṭhāya sabbantaṃ pavattiṃ ārocesi. Satthā tassa vacanaṃ sutvā "brāhmaṇa paṇḍitā nāma khaṇe khaṇe thokaṃ thokaṃ kusalaṃ karontā, anupubbena attano akusalamalaṃ nīharantiyevāti vatvā imaṃ gāthamāha

"anupubbena medhāvī thokaṃ thokaṃ khaṇe khaṇe

kammāro rajatasseva niddhame malamattanoti.