Sattasuriyapātubhāvaṃ nissāya uppanno kappavināsako aggipi kiñci anavasesetvā lokaṃ dahati, so pana kadāciyeva dahati; rāgaggino adahanakālo nāma natthi; tasmā rāgasamo vā aggi dosasamo vā gaho mohasamaṃ vā jālaṃ taṇhāsamā vā nadī nāma natthīti vatvā imaṃ gāthamāha

"natthi rāgasamo aggi, natthi dosasamo gaho,

natthi mohasamaṃ jālaṃ, natthi taṇhāsamā nadīti.

Tattha "rāgasamoti: dhūmādīsu kiñci adassetvā antoyeva uṭṭhāya jhāyanavasena rāgena samo aggi nāma natthi. Dosasamoti: yakkhaggahaajagaraggahakumbhīlaggahādayo ekasmiṃyeva attabhāve gaṇhituṃ sakkonti, dosaggaho pana ekantameva gaṇhātīti dosena samo gaho nāma natthi. Mohasamaṃ jālanti: onaddhana pariyonaddhanatthena pana mohena samaṃ jālaṃ nāma natthi. Taṇhāsamāti: gaṅgādīnaṃ nadīnaṃ puṇṇakālopi ūnakālopi sukkhakālopi paññāyati, taṇhāya pana puṇṇakālo vā sukkhakālo vā natthi, niccaṃ ūnāva paññāyatīti duppūraṇatthena taṇhāya samā nadī nāma natthīti attho.