So kira sattannaṃ buddhānaṃ sāsane tepiṭako pañcannaṃ bhikkhusatānaṃ dhammaṃ vācesi. Satthā cintesi "imassa bhikkhuno `attano dukkhanissaraṇaṃ karissāmīti cittaṃpi natthi, saṃvejessāmi nanti. Tato paṭṭhāya taṃ theraṃ attano upaṭṭhānaṃ āgatakāle "ehi tucchapoṭhila, nisīda tucchapoṭhila, yāhi tucchapoṭhilāti vadeti, uṭṭhāya gatakālepi "tucchapoṭhilo gatoti vadeti. So cintesi "ahaṃ sāṭṭhakathāni tīṇi piṭakāni dhāremi, pañcannaṃ bhikkhusatānaṃ aṭṭhārasa mahāgaṇe dhammaṃ vācemi, atha ca pana maṃ satthā abhikkhaṇaṃ `tucchapoṭhilāti vadeti, addhā maṃ satthā jhānādīnaṃ abhāvena evaṃ vadetīti. So uppannasaṃvego "araññaṃ idāni pavisitvā samaṇadhammaṃ karissāmīti sayameva pattacīvaraṃ saṃvidahitvā paccūsakāle sabbapacchā dhammaṃ uggaṇhitvā nikkhamantena bhikkhunā saddhiṃ nikkhami. Pariveṇe nisīditvā sajjhāyantā taṃ "ācariyoti na sallakkhesuṃ. So vīsaṃ yojanasataṃ gantvā, ekasmiṃ araññāvāse tiṃsa bhikkhū vasanti, te upasaṅkamitvā saṅghattheraṃ vanditvā "bhante avassayo me hothāti āha. "āvuso tvaṃ dhammakathiko, amhehi nāma taṃ nissāya kiñci
Jānitabbaṃ bhaveyya, kasmā evaṃ vadesīti. "mā bhante evaṃ karotha, avassayo me hothāti. Te pana sabbe khīṇāsavāva. Atha naṃ mahāthero "imassa uggahaṃ nissāya māno atthiyevāti anutherassa santikaṃ pahiṇi. Sopi taṃ tathevāha. Iminā nīhārena sabbepi taṃ pesentā divāṭṭhāne nisīditvā sūcikammaṃ karontassa sabbanavakassa sattavassika- sāmaṇerassa santikaṃ pahiṇiṃsu. Evamassa mānaṃ nīhariṃsu. So nīhatamāno sāmaṇerassa santike añjaliṃ paggahetvā "avassayo me hohi sappurisāti āha. "aho ācariya kiṃ nāmetaṃ kathetha, tumhe mahallakā bahussutā, tumhākaṃ santike mayā kiñci kāraṇaṃ jānitabbaṃ bhaveyyāti. "mā evaṃ kari sappurisa, hohiyeva me avassayoti. "bhante sace ovādakkhamā bhavissatha, bhavissāmi vo avassayoti. "homi sappurisa, ahaṃ `aggiṃ pavisāti vutte, aggiṃpi pavisissāmi evāti. Atha naṃ so avidūre ekaṃ saraṃ dassetvā "bhante yathā nivatthapārutāva imaṃ saraṃ pavisathāti āha. So hissa mahagghānaṃ dupaṭṭacīvarānaṃ nivatthapārutabhāvaṃ ñatvāpi "ovādakkhamo nu kho noti vīmaṃsanto evamāha. Theropi ekavacaneneva otari. Atha naṃ cīvarakaṇṇānaṃ temanakāle "etha bhanteti vatvā, ekavacaneneva āgantvā ṭhitaṃ āha "bhante ekasmiṃ vammike cha chiddāni, tattha ekena chiddena godhā anto paviṭṭhā, taṃ gaṇhitukāmo itarāni pañca chiddāni thaketvā chaṭṭhaṃ bhinditvā paviṭṭhacchiddeneva gaṇhāti; Evaṃ tumhepi chadvārikesu ārammaṇesu sesāni pañca dvārāni pidhāya manodvāre kammaṃ paṭṭhapethāti. Bahussutassa bhikkhuno ettakeneva padīpujjalanaṃ viya ahosi. So "ettakameva hotu sappurisāti karajakāye ñāṇaṃ otāretvā samaṇadhammaṃ ārabhi.