Ekadivasaṃ hi sambahulā āgantukā bhikkhū satthāraṃ divāṭṭhāne nisinnaṃ upasaṅkamitvā vanditvā ekamantaṃ nisīdiṃsu. Tasmiṃ khaṇe Lakuṇṭakabhaddiyatthero bhagavato avidūre atikkamati. Satthā tesaṃ bhikkhūnaṃ cittavāraṃ ñatvā "passatha bhikkhave, ayaṃ bhikkhu mātāpitaro hanitvā niddukkho hutvā yātīti vatvā, tehi [bhikkhūhi] "kiṃ nu kho satthā vadatīti aññamaññaṃ mukhāni oloketvā saṃsayaṃ pakkhantehi "kiṃ nāmetaṃ vadathāti vutte, tesaṃ dhammaṃ desento imaṃ gāthamāha

"mātaraṃ pitaraṃ hantvā rājāno dve ca khattiye

raṭṭhaṃ sānucaraṃ hantvā anīgho yāti brāhmaṇoti.

Tattha "sānucaranti: āyasādhakena āyuttakena sahitaṃ, ettha hi "taṇhā janeti purisanti vacanato tīsu bhavesu sattānaṃ jananato taṇhā mātā nāma. "ahaṃ asukassa nāma rañño vā rājamahāmattassa vā puttoti pitaraṃ nissāya asmimānassa uppajjanato asmimāno pitā nāma. Loko viya rājānaṃ yasmā sabbāni diṭṭhigatāni dve sassatucchedadiṭṭhiyo bhajanti; tasmā sassatucchedadiṭṭhiyo dve khattiyarājāno nāma. Dvādasāyatanāni vitthatatthena raṭṭhasadisattā raṭṭhaṃ nāma. Āyasādhako āyuttakapuriso viya taṃ nissito nandirāgo anucaro nāma. Anīghoti: niddukkho. Brāhmaṇoti: khīṇāsavo. Etesaṃ taṇhādīnaṃ arahattamaggaññāṇāsinā hatattā khīṇāsavo. Niddukkho hutvā yātīti ayamettha attho.