"dūre santo pakāsentīti imaṃ dhammadesanaṃ satthā jetavane viharanto anāthapiṇḍikassa dhītaraṃ cūḷasubhaddaṃ nāma ārabbha kathesi.
Anāthapiṇḍikassa kira daharakālato paṭṭhāya ugganagaravāsī uggo nāma seṭṭhiputto sahāyako ahosi. Te ekācariyakule sippaṃ uggaṇhantā aññamaññaṃ katikaṃ kariṃsu "amhākaṃ vayappattakāle puttadhītāsu jātāsu, yo puttassa atthāya dhītaraṃ vāreti; tena tassa dhītā dātabbāti. Te ubhopi vayappattā attano attano nagare seṭṭhiṭṭhāne patiṭṭhahiṃsu.
Ekasmiṃ samaye uggaseṭṭhī vaṇijjaṃ payojento pañcahi sakaṭasatehi sāvatthiṃ agamāsi. Anāthapiṇḍiko attano dhītaraṃ cūḷasubhaddaṃ āmantetvā "amma pitā te uggaseṭṭhī nāma āgato, tassa kattabbakiccaṃ tava bhāroti āṇāpesi. Sā "sādhūti paṭissuṇitvā tassa āgatadivasato paṭṭhāya sahattheneva sūpabyañjanādīni sampādeti, mālāgandhavilepanādīni abhisaṅkharoti, bhojanakāle tassa nahānodakaṃ paṭiyādāpetvā nahānakālato paṭṭhāya sabbakiccāni sādhukaṃ karoti. Uggaseṭṭhī tassā ācārasampattiṃ disvā pasannacitto ekadivasaṃ anāthapiṇḍikena saddhiṃ sukhakathāya nisinno "mayaṃ daharakāle evaṃ nāma katikaṃ karimhāti sāretvā cūḷasubhaddaṃ attano puttassatthāya vāresi. So pana pakatiyā micchādiṭṭhiko; tasmā dasabalassa tamatthaṃ Ārocetvā satthārā uggaseṭṭhino upanissayaṃ disvā anuññāto, bhariyāya saddhiṃ mantetvā tassa vacanaṃ sampaṭicchitvā divasaṃ ṭhapetvā, dhītaraṃ visākhaṃ datvā uyyojento dhanañjayaseṭṭhī viya mahantaṃ sakkāraṃ katvā subhaddaṃ āmantetvā "amma sassurakule vasantiyā nāma anto aggi bahi na nīharitabboti dhanañjayaseṭṭhinā visākhāya dinnanayeneva dasa ovāde datvā uyyojento "sace me gataṭṭhāne dhītu doso uppajjati, tumhehi sodhetabboti aṭṭha kuṭumbike pāṭibhoge gahetvā, tassā uyyojanadivase buddhappamukhassa bhikkhusaṅghassa mahādānaṃ datvā, purimabhave dhītarā katānaṃ sucaritānaṃ phalavibhūtiṃ lokassa pākaṭaṃ katvā dassento viya mahantena sakkārena dhītaraṃ uyyojesi. Tassā anupubbena ugganagaraṃ pattakāle sassurakulena saddhiṃ mahājano paccuggamanaṃ akāsi. Sāpi attano sirivibhavaṃ pākaṭaṃ kātuṃ visākhā viya sakalanagarassa attānaṃ dassentī rathe ṭhatvā nagaraṃ pavisitvā nāgarehi pesitaṃ paṇṇākāraṃ gahetvā anurūpavasena tesaṃ tesaṃ pesentī sakalanagaraṃ attano guṇehi ekabaddhaṃ akāsi.