"dūre santo pakāsenti, himavantova pabbato;

asantettha na dissanti, rattiṃ khittā yathā sarāti.

Tattha "santoti: rāgādīnaṃ santatāya buddhādayo santo nāma. Idha pana pubbabuddhesu katādhikārā ussannakusalamūlā bhāvitabhāvanā sattā "santoti adhippetā. Pakāsentīti: dūre ṭhitāpi buddhānaṃ ñāṇapathaṃ āgacchantā pākaṭā honti. Himavantovāti: yathā hi tiyojanasahassavitthato pañcayojanasatubbedho caturāsītiyā kūṭasahassehi paṭimaṇḍito himavantapabbato dūre ṭhitānaṃpi abhimukhe ṭhito viya pakāseti; evaṃ pakāsentīti attho. Asantetthāti: diṭṭhadhammagarukā vitiṇṇaparalokā āmisacakkhukā jīvitatthāya pabbajitā bālapuggalā asanto nāma, te ettha buddhānaṃ dakkhiṇassa jānumaṇḍalassa santike nisinnāpi na dissanti na paññāyanti. Rattiṃ khittāti: rattiṃ caturaṅgasamannāgate andhakāre khittā sarā viya. Tathārūpassa upanissayabhūtassa pubbahetuno abhāvena na paññāyantīti attho.